ក្រុមគ្រូពេទ្យគ្មានព្រំដែន(MSF)ដែលជាអង្គការមនុស្សធម៌ផ្នែកវេជ្ជសាស្រ្តក្រៅរដ្ឋាភិបាល និយាយថា មន្ទីរពេទ្យមួយកន្លែងក្នុងចំណោមមន្ទីរពេទ្យរបស់ខ្លួន នៅស៊ូដង់ខាងត្បូង រងការវាយប្រហារតាមច្រកអាកាសរបស់រដ្ឋាភិបាល ស្របពេលការប្រយុទ្ធគ្នាថ្មី បានផ្ទុះឡើងរវាងទាហាន និងកងកម្លាំងចម្រុះរបស់ក្រុមប្រឆាំង នៅតំបន់កាន់កាប់ដោយក្រុមប្រឆាំង ។

ការវាយប្រហារលើមន្ទីរពេទ្យ ស្ថិតក្នុងទីក្រុង Lankien រដ្ឋ Jonglei គឺជាការវាយប្រហារលើកទី ១០ ក្នុងរយៈពេល ១២ខែកន្លងមកនេះ លើមន្ទីរពេទ្យគ្រប់គ្រងដោយក្រុមគ្រូពេទ្យ MSF នៅក្នុងប្រទេសមួយនេះ ។

ការវាយប្រហារនេះដែរ បានកើតមានឡើង ក្រោយកាលពីខែធ្នូ ឆ្នាំកន្លងទៅ រដ្ឋាភិបាលស៊ូដង់ខាងត្បូង បានរឹតត្បិតការចូលដល់ជំនួយមនុស្សធម៌ នៅតំបន់គ្រប់គ្រងដោយក្រុមប្រឆាំង ស្ថិតក្នុងរដ្ឋ Jonglei រឹតត្បិតសមត្ថភាពរបស់ក្រុមគ្រូពេទ្យ MSF ក្នុងការចែកចាយជំនួយវេជ្ជសាស្រ្តចាំបាច់ទៅកាន់ទីនោះ ។

ក្រុមគ្រូពេទ្យ MSF និយាយនៅក្នុងសេចក្តីថ្លែងការណ៍ថា មន្ទីរពេទ្យត្រូវបានជម្លៀសមនុស្សចេញ ហើយអ្នកជំងឺត្រូវបានអនុញ្ញាតឲ្យចេញពីមន្ទីរពេទ្យ រយៈពេលច្រើនម៉ោង មុនការវាយប្រហារកើតឡើង បន្ទាប់ពីពួកគេទទួលបានដំណឹងថា អាចនឹងមានលទ្ធភាពនៃការវាយប្រហារលើទីក្រុង Lankien ។ សមាជិកម្នាក់របស់ក្រុមគ្រូពេទ្យ MSF បានរងរបួសស្រាល ។

សេចក្តីថ្លែងការណ៍បន្តថា ឃ្លាំងស្តុកថ្នាំពេទ្យសំខាន់នៅក្នុងមន្ទីរពេទ្យ ត្រូវបានបំផ្លិចបំផ្លាញ អំឡុងការវាយប្រហារនេះ ហើយពួកយើងបាត់បង់គ្រឿងផ្គត់ផ្គង់វេជ្ជសាស្រ្តសំខាន់ៗ សម្រាប់ការថែទាំអ្នកជំងឺ ។

នៅក្នុងឧបទ្ទេវហេតុដាច់ដោយឡែកមួយផ្សេងទៀត ក្រុមគ្រូពេទ្យ MSF និយាយថា មន្ទីរពេទ្យរបស់ខ្លួននៅសង្កាត់ Pieri ស្ថិតក្នុងទីក្រុង Jonglei ដែរនោះ ត្រូវបានចោរចូលលួចកាលពីថ្ងៃអង្គារ ធ្វើឲ្យវាលែងអាចប្រើប្រាស់បាន សម្រាប់សហគមន៍ក្នុងស្រុក ៕