សមាគមគ្រិស្តសាសនិកនីហ្សេរីយ៉ា(CAN) និយាយថា មនុស្សទាំង ១៦៦នាក់ ដែលត្រូវបានចាប់ជម្រិត អំឡុងការវាយប្រហារមួយលើផ្ទះសម្បែងប្រជាពលរដ្ឋ និងព្រះវិហារ ស្ថិតក្នុងភូមិសហគមន៍ Kurmin Wali នៅរដ្ឋភាគខាងជើង Kaduna របស់ប្រទេសនីហ្សេរីយ៉ា កាលពីខែមុន ត្រូវបានដោះលែងឲ្យមានសេរីភាពវិញហើយ ។

លោកបូជាចារ្យ John Hayab គឺជាប្រធានសមាគម CAN និយាយនៅថ្ងៃព្រហស្បតិ៍នេះថា រាល់អ្នកគោរពបូជាត្រូវបានចាប់ជម្រិត បច្ចុប្បន្នបានវិលត្រឡប់មកវិញអស់ហើយ ដោយលោកពុំបានផ្តល់រឿងរ៉ាវលម្អិតថាតើប្រាក់លោះប៉ុន្មានត្រូវបង់នោះទេ ឬវិធីដែលការដោះលែងសម្រេចបាន ។

លោកបូជាចារ្យ Hayab បានបញ្ជាក់ពីការដោះលែងនេះ ហើយលោកនិយាយថា លោកទើបវិលត្រឡប់មកពីនិវេសនដ្ឋានអភិបាលរដ្ឋ Kaduna ជាទីកន្លែងដែលលោកអភិបាល បានទទួលក្រុមគោរពបូជាទាំងអស់នោះ ។

លោកបន្តថា ឆាកត្រូវបានរៀបចំ សម្រាប់ទទួលពួកគេ លោកឯកឧត្តមនឹងជួបពួកគេ ។ នេះគឺជាលទ្ធផលនៃការបន់ស្រន់របស់ពួកយើង ។

ក្រុមមន្រ្តីរដ្ឋាភិបាលនីហ្សេរីយ៉ា ពុំបានធ្វើសេចក្តីអត្ថាធិប្បាយជាសាធារណៈនៅឡើយទេ ចំពោះការដោះលែងមនុស្សដែលត្រូវបានចាប់ជម្រិតទាំងនេះ ។

ទោះបីជាយ៉ាងណាក៏ដោយ សារព័ត៌មាននីហ្សេរីយ៉ា រាយការណ៍ថា អភិបាលរដ្ឋ Kaduna លោក Uba Sani បានបញ្ជាក់ពីការវិលត្រឡប់មកវិញរបស់មនុស្ស ៨២នាក់ប៉ុណ្ណោះ ក្នុងចំណោមអ្នកដែលត្រូវបានចាប់ជម្រិត ។

សូមបញ្ជាក់ថា កាលពីព្រឹកថ្ងៃទី ១៨ ខែមករា ឆ្នាំ ២០២៦កន្លងទៅ ក្រុមខ្មាន់កាំភ្លើងដែលអ្នកស្រុកហៅថាក្រុមចោរប្លន់ បានមកដល់ភូមិសហគមន៍ Kurmin Wali ប្រដាប់ដោយកាំភ្លើងវែង AK47 ៕