ក្រុមមន្រ្តីនិយាយថា អ៊ុយក្រែន និងរុស្ស៊ី បានបញ្ចប់ថ្ងៃទី ២នៃកិច្ចប្រជុំគាំទ្រដោយសហរដ្ឋអាមេរិកនៅទីក្រុង Abu Dhabi ប្រទេសអារ៉ាប់រួមនាថ្ងៃព្រហស្បតិ៍នេះ ដើម្បីបញ្ចប់ជម្លោះដ៏បំផ្លិចបំផ្លាញបំផុតនៅអឺរ៉ុប ចាប់តាំងពីសង្រ្គាមលោកលើកទី ២ ដោយពួកគេបានយល់ព្រមដោះដូរឈ្លើយសឹកបន្ថែមទៀត ដែលជាការដោះដូរលើកដំបូង ក្នុងរយៈពេល ៥ខែកន្លងមកនេះ ។

លោក Steve Witkoff គឺជាប្រេសិតពិសេសរបស់ប្រធានាធិបតីសហរដ្ឋអាមេរិកលោក Donald Trump និយាយថា គណៈប្រតិភូមកពីសហរដ្ឋអាមេរិក អ៊ុយក្រែន និងរុស្ស៊ី បានឯកភាពគ្នាដោះដូរឈ្លើយសឹកចំនួន ៣១៤នាក់ ។

លោក Witkoff និយាយនៅក្នុងសារបង្ហោះលើបណ្តាញព័ត៌មានសង្គម Xថា ខណៈការងារសំខាន់នៅមាន ជំហានបែបនេះបញ្ជាក់ថា ការចូលរួមវិស័យការទូត កំពុងផ្តល់លទ្ធផលជាក់ស្តែង ហើយនិងជំរុញកិច្ចខិតខំ ដើម្បីបញ្ចប់សង្រ្គាមនៅអ៊ុយក្រែន ។

ភាគីរុស្ស៊ី និងអ៊ុយក្រែន និយាយផងដែរថា កិច្ចប្រជុំទទួលបានលទ្ធផលវិជ្ជមានមកទល់នឹងពេលនេះ ។ មន្រ្តីអ៊ុយក្រែនមួយរូបនិយាយថា កិច្ចប្រជុំបច្ចុប្បន្នបានបញ្ចប់ហើយ ។ 

កាលពីយប់ថ្ងៃពុធម្សិលមិញ អ្នកចរចាជាន់ខ្ពស់មួយរូបរបស់អ៊ុយក្រែនលោក Rustem Umerov បានចាត់ទុកថ្ងៃដំបូងនៃកិច្ចប្រជុំនៅទីក្រុង Abu Dhabi ថាមានអត្ថន័យ ហើយនិងផ្លែផ្កា ដោយផ្តោតសំខាន់លើជំហានរឹងមាំ និងដំណោះស្រាយច្បាស់លាស់ ៕