ភាគីជម្លោះរុស្ស៊ី និងអ៊ុយក្រែន បានបិទបញ្ចប់កិច្ចចរចាសន្តិភាពជុំទីពីរ ដែលសម្របសម្រួលដោយសហរដ្ឋអាមេរិក នៅទីក្រុងអាប៊ូដាប៊ី កាលពីថ្ងៃព្រហស្បតិ៍ (៥ កុម្ភៈ) សប្ដាហ៍នេះ ដែលមានគោលបំណងបញ្ចប់ជម្លោះដ៏ធំនិងបង្ហូរឈាមបំផុតរបស់អឺរ៉ុបចាប់តាំងពីសង្គ្រាមលោកលើកទីពីរមក ដោយភាគីទាំងពីរបានឯកភាពធ្វើការដោះដូរឈ្លើយសឹកដ៏សំខាន់មួយ និងយល់ព្រមបន្តកិច្ចចរចាជាថ្មីម្ដងទៀតក្នុងពេលឆាប់ៗនេះ។

បេសកជនពិសេសរបស់លោកប្រធានាធិបតីអាមេរិក Donald Trump គឺលោក Steve Witkoff បាននិយាយថា គណៈប្រតិភូមកពីសហរដ្ឋអាមេរិក អ៊ុយក្រែន និងរុស្ស៊ី បានឯកភាពលើការដោះដូរឈ្លើយសឹកទាំងសងខាងសរុបចំនួន ៣១៤នាក់ ដែលបានធ្វើឡើងរួចរាល់ហើយកាលពីថ្ងៃព្រហស្បតិ៍។ នេះជាការដោះដូរបែបនេះលើកដំបូងក្នុងរយៈពេល ៥ខែ។

ប្រធានាធិបតីអ៊ុយក្រែន លោក Volodymyr Zelenskyy បាននិយាយថា ឈ្លើយសឹកមួយចំនួនដែលត្រូវដោះលែង ត្រូវបានជាប់ឃុំអស់ជិត ៤ឆ្នាំ។ លោកបន្តថា កិច្ចចរចាជុំបន្ទាប់នឹងត្រូវធ្វើឡើងក្នុងពេលឆាប់ៗ ដែលទំនងជានៅសហរដ្ឋអាមេរិក ដោយសង្កត់ធ្ងន់ថា លោកចង់ឱ្យកិច្ចចរចានាំទៅដល់ការបញ្ចប់សង្គ្រាម ៤ឆ្នាំមកនេះ ប៉ុន្តែក៏បញ្ជាក់ម្តងទៀតនូវការទទូចរបស់លោកថា អ៊ុយក្រែនត្រូវតែទទួលបានការធានាសន្តិសុខដ៏រឹងមាំ រួមទាំងពីទីក្រុងវ៉ាស៊ីនតោន ដើម្បីធានាថា រុស្ស៊ីមិនវាយប្រហារម្តងទៀត។

លោក Kirill Dmitriev ប្រេសិតរបស់រុស្ស៊ី បាននិយាយថា មានវឌ្ឍនភាព និងចលនាវិជ្ជមាន។ លោកក៏បាននិយាយថា កិច្ចការងារកំពុងដំណើរការដើម្បីស្តារទំនាក់ទំនងរបស់រុស្ស៊ីជាមួយសហរដ្ឋអាមេរិក រួមទាំងក្នុងក្រុមការងារអាមេរិក-រុស្ស៊ី ស្តីពីសេដ្ឋកិច្ចផងដែរ៕