មន្ត្រីជាន់ខ្ពស់សហរដ្ឋអាមេរិក និងអ៊ីរ៉ង់ត្រូវគេរំពឹងថានឹងជួបគ្នានៅថ្ងៃនេះ ក្នុងប្រទេសអូម៉ង់ សម្រាប់កិច្ចពិភាក្សាដោយផ្ទាល់ ស្របពេលមានវិបត្តិមួយ ដែលបានបង្កើនការព្រួយបារម្ភនៃការប្រឈមដាក់គ្នាខាងយោធារវាងប្រទេសទាំងពីរ។   

ការពិភាក្សាទាំងនេះបានកើតឡើងបន្ទាប់ពីការបង្កើនយោធារបស់សហរដ្ឋអាមេរិកនៅមជ្ឈិមបូព៌ា ដើម្បីឆ្លើយតបទៅនឹងការបង្ក្រាបដោយហិង្សារបស់អ៊ីរ៉ង់លើការតវ៉ាប្រឆាំងរដ្ឋាភិបាលទូទាំងប្រទេសកាលពីខែមុន ដែលក្រុមសិទ្ធិមនុស្សនិយាយថាបានសម្លាប់មនុស្សរាប់ពាន់នាក់។

ភាពមិនច្បាស់លាស់លើជំហរ និងការកំណត់វិសាលភាព បានគំរាមកំហែងដល់ការចរចា ដែលជាផ្នែកមួយនៃកិច្ចខិតខំប្រឹងប្រែងផ្នែកការទូតដោយក្រុមអ្នកសម្របសម្រួលក្នុងតំបន់ ដើម្បីបន្ថយភាពតានតឹង។

ប្រទេសទាំងពីរនៅតែមានជំហរខ្វែងគំនិតគ្នាខ្លាំង។ ក្តីសង្ឃឹមគឺថា ប្រសិនបើទទួលបានជោគជ័យ ការពិភាក្សានានា អាចនាំឱ្យមានក្របខ័ណ្ឌគោលសម្រាប់ការចរចា។  

សហរដ្ឋអាមេរិក ដែលកំពុងទាមទារឱ្យអ៊ីរ៉ង់បញ្ឈប់កម្មវិធីនុយក្លេអ៊ែររបស់ខ្លួន និងបោះបង់ចោលឃ្លាំងស្តុកអ៊ុយរ៉ានីញ៉ូមដែលខ្លួនបានចម្រាញ់រួច បាននិយាយថា កិច្ចពិភាក្សានេះក៏គួរតែពាក់ព័ន្ធនឹងមីស៊ីលផ្លោងរបស់អ៊ីរ៉ង់ ការគាំទ្ររបស់ប្រទេសនេះចំពោះក្រុមប្រដាប់អាវុធក្នុងតំបន់ និងការប្រព្រឹត្តរបស់ខ្លួនចំពោះពលរដ្ឋរបស់ខ្លួន។   

ទោះយ៉ាងណាក៏ដោយ អ៊ីរ៉ង់បាននិយាយថា ការពិភាក្សានឹងត្រូវបានកំណត់ចំពោះកម្មវិធីនុយក្លេអ៊ែររបស់ខ្លួន ហើយគេមិនច្បាស់ទេថាតើការខ្វែងគំនិតគ្នាទាំងនេះត្រូវបានដោះស្រាយឬអត់។

ក្នុងរយៈពេលប៉ុន្មានសប្តាហ៍ថ្មីៗនេះ ប្រធានាធិបតី Trump បានគំរាមវាយប្រហារអ៊ីរ៉ង់ ប្រសិនបើអ៊ីរ៉ង់មិនឈានដល់កិច្ចព្រមព្រៀង។ សហរដ្ឋអាមេរិកបានបញ្ជូនកងទ័ពរាប់ពាន់នាក់ និងអ្វីដែលលោក Trump បានហៅថាជា «កងនាវាចម្បាំង» ទៅកាន់តំបន់នេះ រួមទាំងនាវាផ្ទុកយន្តហោះ រួមជាមួយនាវាចម្បាំងផ្សេងទៀត ក៏ដូចជាយន្តហោះចម្បាំងផងដែរ៕