ប្រធានសិទ្ធិមនុស្សអង្គការសហប្រជាជាតិបាននិយាយកាលពីថ្ងៃព្រហស្បតិ៍ ៥កុម្ភៈសប្ដាហ៍នេះថា ការិយាល័យរបស់លោកកំពុងស្ថិតក្នុង «របៀបរស់រានមានជីវិត» ខណៈលោកបានដាក់សំណើសុំថវិកាចំនួន ៤០០ លានដុល្លារដើម្បីបំពេញតម្រូវការប៉ាន់ប្រមាណរបស់ខ្លួននៅឆ្នាំនេះ បន្ទាប់ពីការកាត់បន្ថយកញ្ចប់ថវិកាកាលពីឆ្នាំមុន បានធ្វើឱ្យប៉ះពាល់ដល់ការងាររបស់ខ្លួននៅក្នុងប្រទេសចំនួន ១៧ រួមទាំងប្រទេសកូឡុំប៊ី មីយ៉ាន់ម៉ា ស៊ូដង់ និងឆាដ។

លោក Volker Türk បានបង្ហាញតម្រូវការនៃការិយាល័យរបស់លោក បន្ទាប់ពីម្ចាស់ជំនួយធំបំផុតគឺសហរដ្ឋអាមេរិក និងអ្នកផ្តល់ជំនួយធំៗមួយចំនួនទៀតនៅបស្ចិមលោកបានកាត់បន្ថយការចំណាយរបស់ពួកគេសម្រាប់ជំនួយមនុស្សធម៌ និងអង្គការពាក់ព័ន្ធនឹងអង្គការសហប្រជាជាតិជាច្រើននៅឆ្នាំ ២០២៥ ដោយព្រមានអំពីការខូចខាតដល់ការត្រួតពិនិត្យសិទ្ធិរបស់ខ្លួននៅទូទាំងពិភពលោក។    

លោកបានប្រាប់ក្រុមអ្នកការទូតនៅទីស្នាក់ការកណ្តាលការិយាល័យរបស់លោកនៅទីក្រុង ហ្សឺណែវថា ការកាត់បន្ថយទាំងនេះ ជាការបើកដៃឱ្យក្រុមជនល្មើសគ្រប់ទីកន្លែង ដោយទុកឱ្យពួកគេធ្វើអ្វីតាមតែអំពើចិត្ត។ ដោយសារវិបត្តិកើនឡើង ពួកលោកមិនអាចមានលទ្ធភាពទទួលបានប្រព័ន្ធសិទ្ធិមនុស្សដែលកំពុងស្ថិតក្នុងវិបត្តិនោះទេ។ 

លោក Türk បាននិយាយថា លោកសូមថ្លែងអំណរគុណដល់ដៃគូផ្តល់មូលនិធិចំនួន ១១៣ របស់លោក រួមទាំងរដ្ឋាភិបាល វិស័យឯកជន និងអ្នកផ្តល់ជំនួយពហុភាគី ចំពោះការចូលរួមចំណែកដ៏សំខាន់របស់ពួកគេ។ ប៉ុន្តែបច្ចុប្បន្នពួកលោកកំពុងស្ថិតក្នុងរបៀបរស់រានមានជីវិត ដោយផ្តល់ជំនួយក្រោមសម្ពាធ។ការិយាល័យរបស់លោកទទួលបានប្រាក់តាមរយៈថវិកាធម្មតារបស់អង្គការសហប្រជាជាតិ ប៉ុន្តែតាមប្រពៃណីទទួលបានមូលនិធិភាគច្រើនរបស់ខ្លួនតាមរយៈការចូលរួមវិភាគទានដោយស្ម័គ្រចិត្តពីប្រទេសជាសមាជិក។ ការិយាល័យនេះកំពុងស្វែងរកមូលនិធិស្ម័គ្រចិត្តចំនួន ៤០០ លានដុល្លារនៅឆ្នាំនេះ៕