ក្រុមភ្នាក់ងារមនុស្សធម៌របស់អង្គការសហប្រជាជាតិបាននិយាយកាលពីថ្ងៃព្រហស្បតិ៍៥កុម្ភៈសប្ដាហ៍នេះថា ក្រសួងសុខាភិបាលដែលមានមូលដ្ឋាននៅហ្កាហ្សាបានរាយការណ៍ពីការស្លាប់ និងរបួសរាប់សិបនាក់ក្នុងរយៈពេល២៤ ម៉ោងកន្លងមកនេះ ខណៈអ្នកជំងឺ និងកំដរបន្តឆ្លងកាត់ច្រកព្រំដែន រ៉ាហ្វា (Rafah)។

ការិយាល័យសម្របសម្រួលកិច្ចការមនុស្សធម៌អង្គការសហប្រជាជាតិ (OCHA) បាននិយាយថា គិតត្រឹមយប់ថ្ងៃព្រហស្បតិ៍សប្ដាហ៍នេះ ក្រុមការងាររបស់ខ្លួនបានទទួលអ្នកវិលត្រឡប់ចំនួន២៥ នាក់បន្ថែមទៀត ដែលបានឆ្លងកាត់ច្រករ៉ាហ្វា។

ដូចនៅយប់មុនៗដែរ កម្មវិធីអភិវឌ្ឍន៍របស់អង្គការសហប្រជាជាតិបានផ្តល់ការដឹកជញ្ជូនអ្នកជំងឺទៅកាន់មន្ទីរពេទ្យ Nasser ក្នុងទីក្រុង Khan Younis។

ការិយាល័យខាងលើនេះនិយាយថា អង្គការ OCHA និងដៃគូរបស់ខ្លួននៅមន្ទីរពេទ្យ Nasser បានស្វាគមន៍អ្នកវិលត្រឡប់មកពីប្រទេសអេហ្ស៊ីបនៅក្នុងតំបន់រង់ចាំទទួល អមដោយក្រុមអ្នកឯកទេសការពារ អ្នកចិត្តសាស្រ្ត បុគ្គលិកពេទ្យ និងការគាំទ្រផ្សេងៗទៀត។

នៅថ្ងៃពុធសប្ដាហ៍នេះដែរ អង្គការសុខភាពពិភពលោក (WHO) និងដៃគូរបស់ខ្លួនបានជួយដឹកជញ្ជួនអ្នកជំងឺចំនួនប្រាំបីនាក់ និងអ្នកអមដំណើរចំនួន១៧ នាក់ពីហ្កាហ្សាទៅប្រទេសអេហ្ស៊ីបតាមរយៈច្រកព្រំដែនរ៉ាហ្វានេះ។ នៅព្រឹកព្រលឹមថ្ងៃព្រហស្បតិ៍ ពួកគេបានជួយសម្រួលដល់ការដឹកជញ្ជូនអ្នកជំងឺចំនួនប្រាំពីរនាក់ និងអ្នកកំដរចំនួន១៤ នាក់បន្ថែមទៀត៕