បណ្ដាប្រទេសប្រហែលមួយភាគបី ដែលបានចូលរួមក្នុងកិច្ចប្រជុំកំពូលបញ្ញាសប្បនិម្មិតយោធា បានឯកភាពគ្នាកាលពីថ្ងៃព្រហស្បតិ៍ (៥ កុម្ភៈ) ចំពោះសេចក្តីប្រកាសរួមមួយ ស្តីពីរបៀបគ្រប់គ្រងការដាក់ពង្រាយបច្ចេកវិទ្យា AI នៅក្នុងវិស័យសង្គ្រាម ប៉ុន្តែប្រទេសមហាអំណាចយោធាចិន និងសហរដ្ឋអាមេរិក បែរជាជ្រើសរើសមិនចូលរួមក្នុងសេចក្តីប្រកាសនោះទេ។

ក្រុមអ្នកចូលរួមនិងប្រតិភូជាច្រើនបាននិយាយថា ភាពតានតឹងក្នុងទំនាក់ទំនងរវាងសហរដ្ឋអាមេរិក និងសម្ព័ន្ធមិត្តអឺរ៉ុប ព្រមទាំងភាពមិនប្រាកដប្រជាអំពីការវិវត្តនៃទំនាក់ទំនងឆ្លងមហាសមុទ្រអាត្លង់ទិក នៅក្នុងប៉ុន្មានខែនិងប៉ុន្មានឆ្នាំខាងមុខ បានធ្វើឱ្យប្រទេសមួយចំនួនស្ទាក់ស្ទើរក្នុងការចុះហត្ថលេខាលើកិច្ចព្រមព្រៀងរួមគ្នានេះ។

ប្រជាជាតិសរុបចំនួន ៨៥ប្រទេស បានចូលរួមក្នុងកិច្ចប្រជុំកំពូល AI ឈ្មោះថា «បញ្ញាសិប្បនិម្មិតប្រកបដោយការទទួលខុសត្រូវក្នុងវិស័យយោធា (REAIM) » នៅទីក្រុង A Coruna ប្រទេសអេស្ប៉ាញ។ ក្នុងចំណោមនោះ មានតែប្រទេសចំនួន ៣៥ ប៉ុណ្ណោះ ដែលចុះហត្ថលេខាលើការប្តេជ្ញាចិត្តចំពោះគោលការណ៍ ២០ចំណុចស្តីពី AI កាលពីថ្ងៃព្រហស្បតិ៍។ ទាំងនេះរួមមាន ការបញ្ជាក់ពីការទទួលខុសត្រូវរបស់មនុស្សលើអាវុធដែលដំណើរការដោយ AI ការលើកទឹកចិត្តឱ្យមានខ្សែច្រវាក់បញ្ជា និងការគ្រប់គ្រងច្បាស់លាស់ ព្រមទាំងការចែករំលែកព័ត៌មានអំពីការរៀបចំត្រួតពិនិត្យថ្នាក់ជាតិ «ដែលស្របនឹងសន្តិសុខជាតិ« ក្នុងចំណោមចំណុចសំខាន់ផ្សេងទៀត។

ការសន្យារួមគ្នានេះ បានបង្ហាញពីក្ដីបារម្ភកាន់តែខ្លាំងឡើងក្នុងចំណោមរដ្ឋាភិបាលមួយចំនួន ដែលថា ភាពជឿនលឿនឆាប់រហ័សនៃបញ្ញាសិប្បនិម្មិត AI អាចដើរហួសពីច្បាប់ជុំវិញការប្រើប្រាស់ក្នុងវិស័យយោធា ដែលបង្កើនហានិភ័យនៃគ្រោះថ្នាក់ ការគណនាខុស ឬកំណើនភាពតានតឹងដែលមិនបានគិតទុកជាមុន។ បណ្ដាប្រទេសដែលជាហត្ថលេខីសំខាន់ៗកាលពីថ្ងៃព្រហស្បតិ៍នោះ រួមមានកាណាដា អាល្លឺម៉ង់ បារាំង អង់គ្លេស ហូឡង់ កូរ៉េខាងត្បូង និងអ៊ុយក្រែនជាដើម៕