កាលពីល្ងាចថ្ងៃព្រហស្បតិ៍ (៥ កុម្ភៈ) នាយករដ្ឋមន្ត្រីអ៊ីស្រាអែល លោក Benjamin Netanyahu បានកោះប្រជុំគណៈរដ្ឋមន្ត្រីសន្តិសុខនៅទីក្រុងយេរូសាឡិម រយៈពេលមួយថ្ងៃប៉ុណ្ណោះមុនកិច្ចចរចាដែលបានគ្រោងទុកនៅប្រទេសអូម៉ង់ នាថ្ងៃសុក្រនេះ រវាងសហរដ្ឋអាមេរិក និងអ៊ីរ៉ង់ និងស្របពេលដែលសារភាពតានតឹងនៅតែខ្ពស់។

ដំបូងឡើយ កិច្ចប្រជុំកម្រិតខ្ពស់នៃគណៈរដ្ឋមន្ត្រីមួយនេះត្រូវបានកំណត់ឱ្យធ្វើឡើងតាំងតែពីថ្ងៃអាទិត្យចុងសប្ដាហ៍មុន ប៉ុន្តែលោក Netanyahu បានលើកទៅធ្វើនៅថ្ងៃព្រហស្បតិ៍សប្ដាហ៍នេះ។ រដ្ឋមន្ត្រីការបរទេសអ៊ីរ៉ង់ លោក Abbas Araghchi និងប្រេសិតជាន់ខ្ពស់អាមេរិក លោក Steve Witkoff និងលោក Jared Kushner គ្រោងបើកកិច្ចចរចានុយក្លេអ៊ែរនៅអូម៉ង់ក្នុងថ្ងៃសុក្រនេះ ដោយទាំងទីក្រុងតេអេរ៉ង់ និងទីក្រុងវ៉ាស៊ីនតោន នៅតែបន្តការគំរាមកំហែងរបស់ពួកគេ។

ការិយាល័យរបស់លោក Netanyahu មិនបានចេញសេចក្តីថ្លែងការណ៍ ឬអត្ថាធិប្បាយណាមួយលើកិច្ចប្រជុំទេ ប៉ុន្តែទូរទស្សន៍ Channel 12 របស់អ៊ីស្រាអែលរាយការណ៍ថា កិច្ចប្រជុំនោះមិនបានផ្តោតជាចម្បងលើតែអ៊ីរ៉ង់ឡើយ។ របាយការណ៍បន្តថា លោក Netanyahu បានពិភាក្សាបញ្ហាអ៊ីរ៉ង់ នៅមុនកិច្ចប្រជុំគណៈរដ្ឋមន្ត្រីសន្តិសុខនោះទៅទៀត គឺនៅក្នុងសម័យប្រជុំមួយកាលពីថ្ងៃពុធរបស់សភា ជាទីដែលលោក Netanyahu ប្រាប់ក្រុមមន្រ្តីថា «មានការប្រមូលផ្តុំនៃលក្ខខណ្ឌឆ្ពោះទៅរកស្ថានភាពដ៏សំខាន់មួយ ដែលអាចនាំមកនូវការដួលរលំនៃរបបអ៊ីរ៉ង់»។

របាយការណ៍និយាយទៀតថា លោក Netanyahu បានព្រមានថា លោកក៏មិនប្រាកដចិត្តដែរថា តើស្ថានភាពនេះនឹងគ្រប់គ្រាន់សម្រាប់លទ្ធផលបែបនោះដែរឬទេ។ អ្នកនាំពាក្យមួយរូបរបស់សភាអ៊ីស្រាអែល បាននិយាយថា លោក Netanyahu បានថ្លែងទៅកាន់កិច្ចប្រជុំបិទទ្វាររបស់សភាថា ប្រសិនបើអ៊ីរ៉ង់ វាយប្រហារអ៊ីស្រាអែល «នោះអ៊ីរ៉ង់នឹងប្រឈមមុខនឹងការឆ្លើយតបដ៏ខ្លាំងក្លាមួយ»៕