ប្រភពពីមន្ត្រីចំនួន ៦រូបបានប្រាប់សារព័ត៌មានរ៉យទ័រថា បន្ទាប់ពីរុញច្រានអេមីរ៉ាតអារ៉ាប់រួម ចេញពីប្រទេសយេម៉ែន កាលពីចុងឆ្នាំមុន ពេលនេះ អារ៉ាប៊ីសាអ៊ូឌីតកំពុងដាក់ពង្រាយដើមទុននយោបាយនិងចាយប្រាក់រាប់ពាន់លានដុល្លារ ក្នុងកិច្ចប្រឹងប្រែងដើម្បីនាំប្រទេសជិតខាងភាគខាងត្បូងរបស់ខ្លួនមួយនេះ ឱ្យស្ថិតក្រោមការគ្រប់គ្រងរបស់ខ្លួនឱ្យកាន់តែរឹងមាំ ជាសញ្ញាមួយបង្ហាញថា ទីក្រុងរីយ៉ាដកំពុងអះអាងឥទ្ធិពលឡើងវិញនៅក្នុងតំបន់ បន្ទាប់ពីផ្តល់អាទិភាពដល់របៀបវារៈក្នុងស្រុកអស់ជាច្រើនឆ្នាំ។

ប្រភពនិយាយថា បញ្ហាប្រឈមក៏នៅតែមាន។ ព្រះរាជាណាចក្រឈូងសមុទ្រដ៏មានទ្រព្យសម្បត្តិមួយនេះ កំពុងព្យាយាមបង្រួបបង្រួមក្រុមប្រដាប់អាវុធនិងកុលសម្ព័ន្ធដែលបែកបាក់គ្នា ហើយក៏កំពុងគាំទ្ររដ្ឋមួយដែលដួលរលំ តាមរយៈការផ្ដល់សាច់ប្រាក់យ៉ាងច្រើនសន្ធឹកសន្ធាប់ ប៉ុន្តែនៅមានជម្លោះដែលមិនទាន់ដោះស្រាយរួចជាមួយពួកឧទ្ទាមហ៊ួទី នៅភាគខាងជើងយេម៉ែន ខណៈទីក្រុងរីយ៉ាដខ្លួនឯងផ្ទាល់ក៏កំពុងប្រឈមនឹងវិបត្តិថវិកាក្នុងប្រទេសផងដែរ។

យោងតាមមន្ត្រីយេម៉ែន ៤រូប និងមន្រ្តីលោកខាងលិច ២រូប បានឱ្យដឹងថា អារ៉ាប៊ីសាអ៊ូឌីត ដែលមានព្រំប្រទល់ ១.៨០០គីឡូម៉ែត្រជាមួយយេម៉ែន កំពុងផ្តល់ថវិកាជិត ៣ ពាន់លានដុល្លារនៅឆ្នាំ២០២៦នេះ ដើម្បីទូទាត់ប្រាក់ខែសម្រាប់កងកម្លាំងយេម៉ែន និងមន្ត្រីរាជការស៊ីវិល ហើយរួមទាំងថវិកាប្រហែល ១ ពាន់លានដុល្លារ សម្រាប់ប្រាក់ខែរបស់យុទ្ធជននៅភាគខាងត្បូង ដែលធ្លាប់បង់ដោយទីក្រុងអាប៊ូដាប៊ី។

រដ្ឋមន្ត្រីក្រសួងព័ត៌មានយេម៉ែន លោក Muammar Eryani បានប្រាប់រ៉យទ័រក្នុងបទសម្ភាសន៍មួយថា «អារ៉ាប៊ីសាអ៊ូឌីត បានសហការជាមួយយេម៉ែន ហើយបង្ហាញពីការត្រៀមខ្លួនរួចជាស្រេច ក្នុងការបើកប្រាក់ខែទាំងអស់ឱ្យបានពេញលេញ» ដោយមិនផ្តល់តួលេខសរុបនោះទេ។ លោកបន្ថែមថា ការគាំទ្រពីអារ៉ាប៊ីសាអ៊ូឌីត នឹងអនុញ្ញាតឱ្យយេម៉ែន រៀបចំក្រុមប្រដាប់អាវុធឡើងវិញ និងនាំពួកគេមកស្ថិតនៅក្រោមអំណាចរបស់រដ្ឋ៕