យោងតាមផែនទីដែលបានមើលឃើញដោយទីភ្នាក់ងារសារព័ត៌មានរ៉យទ័រ និងប្រភពដែលត្រូវបានជូនដំណឹងអំពីផែនការនេះ បានឱ្យដឹងថា អេមីរ៉ាតអារ៉ាប់រួម បានរៀបចំផែនការសាងសង់បរិវេណអគារដ៏ធំមួយ ដើម្បីផ្តល់ជម្រកដល់ជនជាតិប៉ាឡេស្ទីនរាប់ម៉ឺននាក់ ដែលបាត់បង់ទីជម្រក នៅក្នុងផ្នែកមួយនៃទីក្រុងភាគខាងត្បូងតំបន់ហ្កាហ្សា ក្រោមការគ្រប់គ្រងរបស់យោធាអ៊ីស្រាអែល។

ផែនទីគម្រោងនោះ បង្ហាញឱ្យឃើញកន្លែងមួយឈ្មោះថា «អគារលំនៅដ្ឋានបណ្ដោះអាសន្នរបស់អេមីរ៉ាតអារ៉ាប់រួម» នឹងត្រូវបានសាងសង់នៅជិតទីក្រុងរ៉ាហ្វា (Rafah) ដែលធ្លាប់ជាទីក្រុងមានប្រជាជនប្រហែល ២៥ម៉ឺននាក់ ប៉ុន្តែឥឡូវនេះស្ទើរតែត្រូវបានបំផ្លិចបំផ្លាញខ្ទេចខ្ទី និងបាត់បង់ប្រជាជនអស់ទាំងស្រុង ដោយសារប្រតិបត្តិការយោធាអ៊ីស្រាអែល។

ផែនទីបង្ហាញថា អគារលំនៅដ្ឋានរបស់អេមីរ៉ាតអារ៉ាប់រួម នឹងស្ថិតនៅជិត «បន្ទាត់លឿង» ដែលបានព្រមព្រៀងគ្នាក្រោមបទឈប់បាញ់កាលពីខែតុលា ដើម្បីកំណត់ព្រំដែនរវាងតំបន់ដែលគ្រប់គ្រងដោយអ៊ីស្រាអែល និងក្រុមហាម៉ាស។ទីក្រុងរ៉ាហ្វា ដែលនៅជិតព្រំដែនអេហ្ស៊ីប គឺជាទីតាំងមួយដែលការកសាងឡើងវិញនៃតំបន់ហ្កាហ្សា ត្រូវបានរំពឹងថានឹងចាប់ផ្តើម នៅក្រោមផែនការរបស់លោកប្រធានាធិបតីអាមេរិក Donald Trump សម្រាប់សន្តិភាពយូរអង្វែងនៅក្នុងតំបន់ឆ្នេរហ៊ុមព័ទ្ធដែលមានប្រជាជនរស់នៅច្រើនកុះករមួយនេះ បន្ទាប់ពីសង្គ្រាមដ៏បំផ្លិចបំផ្លាញរយៈពេលពីរឆ្នាំ។

បណ្ដាប្រទេសម្ចាស់ជំនួយ ស្ទាក់ស្ទើរក្នុងការផ្តល់មូលនិធិដល់ផែនការនេះ ដោយសារបារម្ភថា ការមិនចុះសម្រុងគ្នាលើការរំសាយអាវុធពីពួកសកម្មប្រយុទ្ធហាម៉ាស អាចនាំឱ្យភាគីទាំងពីរវិលទៅរកជម្លោះទ្រង់ទ្រាយធំវិញ។ ក្រុមអ្នកការទូតនិយាយថា មានការសង្ស័យអំពីលទ្ធភាពនយោបាយនៃគម្រោងរបស់អារ៉ាប់រួមមួយនេះ ដោយសារប្រជាជនប៉ាឡេស្ទីនភាគច្រើនអាចនឹងបដិសេធ មិនព្រមស្នាក់នៅក្នុងតំបន់ដែលគ្រប់គ្រងដោយអ៊ីស្រាអែលនោះទេ ខណៈជនស៊ីវិលភាគច្រើនរស់នៅក្នុងតំបន់ដែលគ្រប់គ្រងដោយក្រុមហាម៉ាស នៃដែនដីហ្កាហ្សា៕