ប្រជាពលរដ្ឋ បានសម្តែងការគាំទ្រខ្ពស់ចំពោះគោលជំហរមុតមាំរបស់ប្រមុខរាជរដ្ឋាភិបាល សម្តេច​ធិបតី ហ៊ុន ម៉ាណែត ដែលបានបន្ត​ជំរុញ​ឱ្យ​អាជ្ញាធរ​ខិតខំ​បោស​សម្អាត​ឧក្រិដ្ឋ​កម្ម​ឆបោក​អន​ឡាញ​ចេញ​ពីកម្ពុជា។

ក្នុងពិធីបិទសន្និបាទបូកសរុបលទ្ធផលការងាររបស់ក្រសួងមហាផ្ទៃ កាលពីម្សិលមិញ សម្តេច​ធិបតី ​ហ៊ុន ម៉ាណែត នាយករដ្ឋមន្ត្រី នៃកម្ពុជា បានបន្តដាក់បញ្ជាដោយគោលជំហរមុតមាំ ចំពោះ​អាជ្ញាធរ​ឱ្យ​បោសសម្អាតអំពើឆបោកតាមប្រព័ន្ធអនឡាញ ដោយសម្តេចលើកឡើងថា « យើង​ត្រូវ​តែ​រួម​គ្នា​ប្តេជ្ញា​ចិត្តសម្អាតផ្ទះយើង ដោយបណ្ដេញរាល់អំពើអាក្រក់ចេញពីប្រទេសឱ្យអស់ ដើម្បី​នាំ​មក​វិញ​នូវ​អ្វីដែលល្អៗ សម្រាប់ជាតិ និង ប្រជាជនយើង» ។

ចំណែកឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ក៏​បាន​បន្ត​ណែ​នាំ​ដាក់កំហិតដល់អាជ្ញាធរនៅតាមថ្នាក់រដ្ឋបាលក្រោមជាតិទាំង២៥រាជធានីខេត្ត ត្រូវ​ម្ចាស់​ការ​ក្នុង​ការ​សម្អាតឧក្រិដ្ឋកម្មឆបោកអនឡាញ (Online Scams) ឱ្យអស់ពីមូលដ្ឋានខ្លួន ត្រឹម​ខែ​មេសា​ ឆ្នាំ២០២៦នេះ។

ពលរដ្ឋ បានបង្ហាញនូវការគាំទ្រខ្ពស់ ចំពោះវិធានការដ៏ម៉ឺងម៉ាត់ ក្នុង​ការ​កម្ទេច​បទ​ល្មើស​ឧក្រិដ្ឋ​ទាំងឡាយ ដែលបានបង្កអសន្តិសុខ និងអស្ថិរភាពដល់ប្រទេសជាតិ។ ពលរដ្ឋ មិនចង់ឲ្យកម្ពុជា ក្លាយ​ជា​ជម្រក នៃបទល្មើសឧក្រិដ្ឋទាំងឡាយនោះទេ ពោលចង់​ឲ្យ​កម្ពុជា​លេច​មុខ​លេច​មាត់​នៅ​ឆាក​អន្តរជាតិ តាមរយៈលទ្ធផលវិជ្ជមានជាច្រើន ដូចជាវប្បធម៌ ទំនៀមទំលាប់ ប្រពៃណី សន្តិភាព ​ក៏ដូចជាការអភិវឌ្ឍន៍ជាដើម ។

ដើម្បីជាការឆ្លើយតប ទៅតាមបទបញ្ជាដ៏ម៉ឺងម៉ាត់របស់សម្តេចធិបតី ហ៊ុន ម៉ាណែត នាយករដ្ឋ​មន្ត្រី ​កងកម្លាំងអាជ្ញាធរមានសមត្ថកិច្ចនៅគ្រប់ជាន់ថ្នាក់ ទាំងថ្នាក់ជាតិ និងរដ្ឋបាលក្រោមជាតិ បាន​នឹងកំពុងបន្តការ យកចិត្តទុកដាក់ខ្ពស់ក្នុងយុទ្ធនាការទប់ស្កាត់ និងបង្ក្រាប​ឲ្យ​មាន​ប្រសិទ្ធភាព​ខ្ពស់ លើបទល្មើសឧក្រិដ្ឋកម្ម ឆបោកតាមប្រព័ន្ធបច្ចេកវិទ្យា (Online Scams) ។ យុទ្ធនាការ នៃ​ការ​ចុះ​រដ្ឋបាលត្រួតពិនិត្យនេះ គឺតែងបានធ្វើ ឡើងជា​រឿយៗ​ទៅ​តាម​ទីតាំង​ជួល​ការ​ស្នាក់​នៅ​តាម​ទីតាំង​ផ្ទះជួ​ល ,អគារបន្ទប់ជួល, ខុនដូរ, ផ្ទះសំណាក់ និង សណ្ឋាគារនានា ដើម្បីធ្វើបច្ចុប្បន្ន​ភាព​កំណត់​ឲ្យ​បាន​ច្បាស់អំពីការរស់នៅដោយស្របច្បាប់ត្រឹមត្រូវរបស់ជន បរទេសទាំងឡាយ ជៀស​វៀង​ការ​ស្នាក់នៅដោយលួចលាក់ប្រព្រឹត្តិឧក្រិដ្ឋកម្មឆបោកតាមប្រព័ន្ធបច្ចេកវិទ្យា៕ អត្ថបទ៖ លីហេង