ប្រធានាធិបតីអាមេរិក ដូណាល់ ត្រាំ ( Donald Trump) បាននិយាយកាលពីថ្ងៃព្រហស្បតិ៍ថា លោកកំពុង «ខិតខំប្រឹងប្រែងធ្វើការ» ដើម្បីបញ្ចប់សង្គ្រាមនៅប្រទេសស៊ូដង់។

លោកប្រធានាធិបតី បានថ្លែងនៅក្នុងព្រឹត្តិការណ៍អាហារពេលព្រឹកអធិស្ឋានជាតិប្រចាំឆ្នាំ នៅរដ្ឋធានីទីក្រុងវ៉ាស៊ីនតោនថា៖ «ខ្ញុំកំពុងខិតខំធ្វើការ ដើម្បីបញ្ចប់សង្គ្រាមនោះ។ យើងជិតដល់ពេលបញ្ចប់ហើយ។ នោះនឹងជាសង្គ្រាមទី ៩ ប្រសិនបើយើងមិនបានបញ្ចប់ជម្លោះរុស្ស៊ី-អ៊ុយក្រែន ជាមុនសិនទេ។ ប៉ុន្តែយើងកំពុងខិតខំប្រឹងប្រែងធ្វើការ ដើម្បីបញ្ចប់សង្គ្រាមទាំងមូលនោះ។ យើងជិតដល់ពេលបញ្ចប់វាហើយ»។

លោក ត្រាំ បាននិយាយជាលើកដំបូងថា លោកនឹងចាប់ផ្តើម «ធ្វើការ»ទៅលើសង្គ្រាមនៅប្រទេសស៊ូដង់ កាលពីខែវិច្ឆិកាកន្លងទៅ បន្ទាប់ពីព្រះអង្គម្ចាស់រាជទាយាទអារ៉ាប៊ីសាអ៊ូឌីត Mohammed bin Salman បានស្នើសុំឲ្យលោកជួយបញ្ចប់ជម្លោះនេះ ក្នុងអំឡុងពេលបំពេញទស្សនកិច្ចនៅសហរដ្ឋអាមេរិក។

លោក ត្រាំ បានថ្លែងនៅឯវេទិកាវិនិយោគអាមេរិក-អារ៉ាប៊ីសាអ៊ូឌីតថា៖«ព្រះមហាក្សត្រនៃព្រះរាជាណាចក្រនេះ ចង់ឲ្យខ្ញុំធ្វើអ្វីមួយដែលមានឥទ្ធិពលខ្លាំងដែលទាក់ទងនឹងប្រទេសស៊ូដង់»។

លោកបានបន្ថែមថា៖«ជម្លោះនៅប្រទេសស៊ូដង់ គឺមិនស្ថិតនៅក្នុងតារាងរបស់ខ្ញុំ ដែលត្រូវចូលរួមនោះទេ ខ្ញុំគិតថា វាគ្រាន់តែជាស្ថានភាពដ៏ច្របូកច្របល់ និងមិនអាចគ្រប់គ្រងបានប៉ុណ្ណោះ»៕