ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ (CAMSOC) បានថ្លែងចំពោះមុខក្រុមជម្រើសជាតិកម្ពុជា ដែលកំពុងប្រមូលផ្ដុំបិទខ្ទប់ហ្វឹកហាត់នៅពហុកីឡដ្ឋានជាតិមរតកតេជោថា ថ្នាក់ដឹកនាំមិនចង់រឹតត្បិតលើការបិទហ្វឹកហាត់នេះឡើយ តែដើម្បីបញ្ចៀសការឆ្លងជំងឺកូវីដ-១៩ ធ្វើឲ្យប៉ះពាល់ដល់ដំណើរការចូលរួមប្រកួតកីឡាស៊ីហ្គេម ទើបថ្នាក់ដឹកនាំសម្រេចធ្វើការរឹតបន្តឹងបែបនេះ។
ការគូសបបញ្ជាក់នេះធ្វើឡើងក្នុងពិធីសំណេះសំណាល ជាមួយក្រុមជម្រើសជាតិក្នុងមណ្ឌលបិទខ្ទប់ហ្វឹកហាត់ នៅពហុកីឡដ្ឋានជាតិមរតកតេជោកាលពីថ្ងៃទី១៦ ខែមីនា ឆ្នាំ២០២២ ដែលមានការចូលរួមពីក្រុមការងារគ្រូបង្វឹក និងកីឡាករ-កីឡាការិនីជម្រើសជាតិគ្រប់ប្រភេទកីឡា ដែលកំពុងប្រមូលផ្ដុំហ្វឹកហាត់នៅទីនោះ។ ឯកឧត្តមបានលើកឡើងថា ជុំរុំបិទខ្ទប់មិនមែនជាកន្លែងហ្វឹកហាត់ធម្មតា ឬដូចនៅផ្ទះនោះទេ គឺជាកន្លែងប្រមូលផ្ដុំដែលមានការលុតដំខ្លួន ការលះបង់ ស្រដៀងនឹងជុំរុំទាហានហ្វឹកហាត់ដែរ។ ហេតុនេះដើម្បីលុតដំត្រូវមានការអត់ធ្មត់ ការព្យាយាម និងជម្នះនូវឧបសគ្គការលំបាកទាំងឡាយ ទាំងការហ្វឹកហាត់ ការស្នាក់នៅ និងការហូបចុកជាដើមដើម្បីឈានទៅសម្រេចក្ដីស្រម៉ៃរបស់ខ្លួន ដែលត្រូវតំណាងជាតិចូលរួមប្រកួតលើឆាកអន្ដរជាតិ។ រដ្ឋលេខាធិការក្រសួងទេសចរណ៍សង្កត់ធ្ងន់ថា ការរឹងបន្តឹងវិន័យនៃការក្បិតក្បៀតនេះគឺថ្នាក់ដឹកនាំមិនចង់ទេ ប្រសិនបើគ្មានបញ្ហាកូវីដ-១៩ ក៏មានការបន្ធូរបន្ថយច្រើនដែរ ប៉ុន្ដែបញ្ហាកូវីដបានធ្វើឲ្យខូចដល់ការងារត្រូវដើរទៅមុខ ពិសេសការប្រកួតកីឡាស៊ីហ្គេមចំពោះមុខ ទាំងស៊ីហ្គេមនៅវៀតណាម និងស៊ីហ្គេមនៅកម្ពុជា ប្រសិនមានតែកីឡាករ ១០% ឬ ២០% មានបញ្ហាកូវីដនោះនឹងមិនអាចចូលរួមប្រកួតកើតឡើយ។
តាមរយៈឯកឧត្តមបានជំរុញ និងលើកទឹកចិត្តឲ្យក្រុមជម្រើសជាតិគ្រប់ប្រភេទកីឡា ត្រូវពង្រឹងការហ្វឹកហាត់ ទាំងបច្ចេកទេស និងចិត្តសាស្ដ្រផងដែរ ពិសេសគ្រូបង្វឹក ដើម្បីសម្រួចគោលដៅឆ្ពោះទៅស៊ីហ្គេម និងការប្រកួតអន្ដរជាតិនានា ហើយត្រូវមានគោលដៅច្បាស់លាស់ក្នុងការហ្វឹកហាត់ថា នឹងត្រូវដណ្ដើមលទ្ធផលជាវិជ្ជមានជូនជាតិ ទាំងការប្រកួតកីឡាស៊ីហ្គេមលើកទី៣១ នៅវៀតណាម ពិសេសស៊ីហ្គេមលើកទី៣២ នៅកម្ពុជា។ តាមការបញ្ជាក់របស់លោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានឲ្យដឹងថា បច្ចុប្បន្នមានក្រុមជម្រើសជាតិ ១៧ប្រភេទកីឡាកំពុងបិទខ្ទប់ប្រមូលផ្ដុំហ្វឹកហាត់នៅពហុកីឡដ្ឋានជាតិមរតកតេជោ ក្នុងនោះមានគ្រូបង្វឹក និងគ្រូជំនួយ ៦៧នាក់ កីឡាករ ២០៩នាក់ និងកីឡាការិនី ១១៩នាក់ សរុប ៤១២នាក់ដើម្បីសម្រួចសមត្ថភាពត្រៀមការប្រកួតស៊ីហ្គេមនៅវៀតណាម នាខែឧសភា ឆ្នាំ២០២២ ខាងមុខ ហើយមានក្រុមជម្រើសជាតិ ២១ប្រភេទកីឡាទៀតកំពុងប្រមូលផ្ដុំហ្វឹកហាត់តាមសហព័ន្ធ និងទីតាំងសុវត្ថិភាពផ្សេងៗ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
