ឯកអគ្គរដ្ឋទូតរបស់ខ្លួន បាននិយាយកាលពីថ្ងៃព្រហស្បតិ៍ថា ស្ថានទូតសហរដ្ឋអាមេរិក នឹង «លែងមានទំនាក់ទំនងបន្តទៀត» ជាមួយប្រធានសភាប៉ូឡូញទៀតហើយ បន្ទាប់ពីមានការអះអាងថា លោកបានប្រមាថលោកប្រធានាធិបតី ដូណាល់ ត្រាំ។

លោក Tom Rose បាននិយាយថា ការសម្រេចចិត្តនេះ ត្រូវបានធ្វើឡើង ដោយសារតែ «ការប្រមាថ ដ៏ធ្ងន់ធ្ងរ និងគ្មានការគោរព»របស់ប្រធានសភាប៉ូឡូញ លោក Wlodzimierz Czarzasty ចំពោះមេដឹកនាំអាមេរិក។

លោក Rose បានសរសេរនៅលើប្រព័ន្ធផ្សព្វផ្សាយសង្គម X ថា៖«យើងនឹងមិនអនុញ្ញាតឲ្យនរណាម្នាក់ធ្វើឲ្យប៉ះពាល់ដល់ទំនាក់ទំនងអាមេរិក-ប៉ូឡូញ ឬមិនគោរព (លោក ត្រាំ) ដែលបានធ្វើកិច្ចការយ៉ាងច្រើនសម្រាប់ប្រទេសប៉ូឡូញ និងប្រជាជនប៉ូឡូញនោះទេ»។

នាយករដ្ឋមន្ត្រីប៉ូឡូញ លោក Donald Tusk បានឆ្លើយតបនៅថ្ងៃដដែលនោះ ដោយសរសេរនៅលើប្រព័ន្ធផ្សព្វផ្សាយសង្គម X ថា៖«លោកឯកអគ្គរដ្ឋទូត Rose និងសម្ព័ន្ធមិត្ត គួរតែគោរពគ្នាទៅវិញទៅមក គឺមិនមែនបន្ទោសគ្នាទៅវិញទៅមកនោះទេ»។

«យ៉ាងហោចណាស់ នេះគឺជារបៀបដែលយើង យល់ពីភាពជាដៃគូ នៅក្នុងប្រទេសប៉ូឡូញ»។

កាលពីថ្ងៃចន្ទ (ទី ០២ ខែកុម្ភៈ) លោក Czarzasty បានរិះគន់សំណើរួមគ្នារវាងសហរដ្ឋអាមេរិក-អ៊ីស្រាអែល ដើម្បីគាំទ្របេក្ខភាពរបស់លោក ដូណាល់ ត្រាំ សម្រាប់រង្វាន់ណូបែលសន្តិភាព។

លោកបានប្រាប់អ្នកសារព័ត៌មានថា៖«ខ្ញុំនឹងមិនគាំទ្រសំណើសុំរង្វាន់ណូបែលសន្តិភាពសម្រាប់លោកប្រធានាធិបតី ត្រាំ ពីព្រោះលោកមិនសមនឹងទទួលបានរង្វាន់នេះទេ»៕