ប្រទេសចិន បានប្រើប្រាស់កម្មវិធីតាំងពិព័រណ៍អាកាសចរណ៍សិង្ហបុរីនៅសប្តាហ៍នេះ ដើម្បីបង្ហាញសាច់ដុំយោធា និងអាកាសចរណ៍របស់ខ្លួន ដោយទាក់ទាញការចាប់អារម្មណ៍យ៉ាងខ្លាំងពីគណៈប្រតិភូក្នុងតំបន់ ខណៈទីក្រុងប៉េកាំង កំពុងពង្រឹងកិច្ចប្រឹងប្រែងសម្រាប់ឥទ្ធិពលនៅអាស៊ីអាគ្នេយ៍។ យោធាអាមេរិកវិញ ក៏បង្ហាញអំណាចយោធារបស់ខ្លួនផងដែរនៅឆ្នាំនេះ គឺតាមរយៈការចាប់ខ្លួនអតីតមេដឹកនាំវ៉េណេស៊ុយអេឡា Nicolas Maduro និងបង្កើនវត្តមានកងទ័ពជើងទឹកដ៏ធំនៅជុំវិញអ៊ីរ៉ង់។ 

ខណៈពេលដែលយន្តហោះចម្បាំង និងយន្តហោះដឹកអ្នកដំណើរពាណិជ្ជកម្មរបស់ប្រទេសចិន នៅតែនៅឆ្ងាយពីការសម្រេចបាននូវទីផ្សារអន្តរជាតិយ៉ាងច្រើន ប៉ុន្តែក្រុមហ៊ុនផលិតរបស់ចិនទាំងនោះ ហាក់មានភាពម៉ឺងម៉ាត់ និងមានទំនុកចិត្តជាងមុន និងមានភាពលេចធ្លោជាងមុនក្នុងឆ្នាំ២០២៦នេះ នៅឯពិព័រណ៍យន្តហោះដ៏ធំបំផុតរបស់អាស៊ី។

ក្រុមសម្តែងផ្លូវអាកាសរបស់កងទ័ពអាកាសចិន (PLA) បានបង្ហាញយន្តហោះចម្បាំងឆឹងទូ J-10C របស់ខ្លួនជាលើកដំបូង ដែលទាក់ទាញចំណាប់អារម្មណ៍យ៉ាងខ្លាំង និងយន្តហោះចម្បាំង J-10CE ដែលទទួលបានភាពទាក់ទាញខ្លាំងក្នុងឆ្នាំ២០២៥ នៅពេលអតិថិជនរបស់ខ្លួនគឺប៉ាគីស្ថាន បានប្រើអាកាសយាននេះដើម្បីបាញ់ទម្លាក់យន្តហោះចម្បាំងបារាំង Rafale មួយគ្រឿងរបស់ទ័ពអាកាសឥណ្ឌា។

ប្រព័ន្ធផ្សព្វផ្សាយរដ្ឋចិន បានរាយការណ៍ថា ក្រុមយន្តហោះនេះបានប្រើប្រាស់ការចាក់ប្រេងពីលើអាកាស ដើម្បីហោះហើរដោយផ្ទាល់ទៅកាន់សិង្ហបុរី សម្រាប់ការសម្ដែងសមត្ថភាពដ៏លេចធ្លោនេះ។ បណ្ដាមន្ត្រីការពារជាតិអាស៊ីអាគ្នេយ៍ បានប្រមូលផ្តុំគ្នានៅតាមស្តង់យោធា និងអវកាសចិន ដែលបង្ហាញពីភាពទាក់ទាញកាន់តែខ្លាំងឡើងរបស់ទីក្រុងប៉េកាំង ស្របពេលដែលខ្លួនកំពុងធ្វើទីផ្សារផ្នែករឹងយ៉ាងសកម្មនៅទូទាំងតំបន់៕