រដ្ឋមន្ត្រីការពារជាតិអង់គ្លេស លោក John Healey បាននិយាយថា រដ្ឋមន្ត្រីការពារជាតិរបស់អង្គការណាតូ (NATO) ទំនងជានឹងពិភាក្សាអំពីវិធានការនានា ដើម្បីពង្រឹងសន្តិសុខរបស់កោះ Greenland (ហ្គ្រីនឡែន) នៅក្នុងកិច្ចប្រជុំមួយ នាសប្តាហ៍ក្រោយ បន្ទាប់ពីប្រធានាធិបតីអាមេរិក លោក Donald Trump ស្ទើរតែបានធ្វើឲ្យសម្ព័ន្ធភាពច្របូលច្របល់ ដោយសារតែបំណងរបស់លោក ក្នុងការដណ្ដើមយកដែនដីនេះ។

លោក Trump បានបញ្ជាក់ម្តងហើយម្តងទៀតថា លោកចង់បានកោះ Greenland ដោយនិយាយថា សម្ព័ន្ធមិត្តអឺរ៉ុប មិនបានការពារវាឲ្យបានត្រឹមត្រូវ។ ការលើកឡើងរបស់លោកបានបង្កឲ្យកើតជម្លោះជាមួយសមាជិកអង្គការណាតូ គឺដាណឺម៉ាក ពាក់ព័ន្ធនឹងទឹកដីក្រៅប្រទេសរបស់ខ្លួននេះ និងបានធ្វើឲ្យសម្ព័ន្ធភាពការពារជាតិមួយនេះមានភាពតានតឹង។

ភាពតានតឹងទាំងនោះបានថមថយ បន្ទាប់ពីអគ្គលេខាធិការអង្គការណាតូ លោក Mark Rutte បាននិយាយថា លោកបានពិភាក្សាអំពីវិធី ដែលសម្ព័ន្ធមិត្តអង្គការណាតូ អាចធ្វើការរួមគ្នា ដើម្បីធានាសន្តិសុខអាក់ទិកជាមួយលោក Trump ប៉ុន្តែសេចក្ដីលម្អិតនៃផែនការទាំងនោះ នៅតែមិនត្រូវបានច្បាស់លាស់ឡើយ។

លោក Healey បាននិយាយថា៖ «បេសកកម្មឆ្មាំអាក់ទិករបស់អង្គការណាតូ (NATO Arctic Sentry) ដែលត្រូវបានស្នើឡើង គឺជាមធ្យោបាយមួយ ដែលយើង ក្នុងនាមជាប្រទេសសមាជិកអង្គការណាតូ អាចបង្ហាញដល់លោកប្រធានាធិបតី Trump ថា យើងកំពុងបង្កើនសន្តិសុខរបស់កោះ Greenland រួចហើយ ហើយជាការបញ្ជាក់ថា យើងទទួលយក និងយល់ព្រម ចំពោះការមានក្ដីបារម្ភរបស់លោក»។

អមដោយការបន្ថែមថា ប្រទេសនានា នឹង «ពង្រឹងបន្ថែមទៀត» លោក Healey បានប្រាប់សារព័ត៌មាន Reuters ក្នុងបទសម្ភាសន៍មួយថា៖ «លោក Trump បានលើកឡើងពីបញ្ហាប្រឈម។ អ្វីដែលយើងកំពុងបង្ហាញដល់រូបលោក គឺថា ណាតូកំពុងដោះស្រាយហើយ។ ខ្ញុំរំពឹងថា នឹងឃើញការពិភាក្សាបន្ថែមទៀត នៅក្នុងកិច្ចប្រជុំរដ្ឋមន្ត្រីការពារជាតិរបស់អង្គការណាតូ ដែលខ្ញុំនឹងចូលរួមនៅទីក្រុងប្រ៊ុចសែល (បែលហ្ស៊ិក) នាសប្តាហ៍ក្រោយ»៕