តុលាការទីក្រុងហុងកុង បាននិយាយនៅថ្ងៃសុក្រ (៦ កុម្ភៈ) នេះថា មហាសេដ្ឋីប្រព័ន្ធផ្សព្វផ្សាយហុងកុង និងជាអ្នកឃោសនាលទ្ធិប្រជាធិបតេយ្យ លោក Jimmy Lai នឹងត្រូវកំណត់រយៈពេលមានទោសនៅថ្ងៃចន្ទ ទី៩ ខែកុម្ភៈ ដើមសប្ដាហ៍ក្រោយនេះ នៅក្នុងសវនាការសន្តិសុខជាតិដ៏ធំមួយដែលត្រូវបានឃ្លាំមើលយ៉ាងដិតដល់។

ក្នុងខែធ្នូកន្លងទៅ តុលាការបានរកឃើញថា លោក Lai វ័យ ៧៨ឆ្នាំ ជាស្ថាបនិកនៃកាសែតគាំទ្រលទ្ធិប្រជាធិបតេយ្យ Apple Daily ដែលឥឡូវនេះត្រូវបានបិទទ្វារ មានទោសពីបទចោទ ២ករណី នៃការឃុបឃិតគ្នាជាមួយកងកម្លាំងបរទេស ក្រោមច្បាប់សន្តិសុខជាតិដែលដាក់ចេញដោយប្រទេសចិន ក៏ដូចជាការចោទប្រកាន់ពីបទឃុបឃិតគ្នាដើម្បីបោះពុម្ពផ្សាយសម្ភារៈញុះញង់។

ស្ថាប័នតុលាការបាននិយាយនៅថ្ងៃសុក្រនេះថា ខ្លួនកំពុងអំពាវនាវឱ្យមានសវនាការកាត់ទោសនៅម៉ោងក្នុងស្រុក ១០ ព្រឹកថ្ងៃចន្ទសប្ដាហ៍ក្រោយ។ លោក Lai ដែលបានផ្ដល់ចម្លើយពីភាពគ្មានទោស អាចប្រឈមនឹងការជាប់ពន្ធនាគារអស់មួយជីវិត។

ការជំនុំជម្រះក្ដីជាបន្តបន្ទាប់នេះបានចាប់ផ្តើមនៅខែធ្នូ ឆ្នាំ២០២៣ ហើយបានដំណើរការរយៈពេល ១៥៦ថ្ងៃ។ នៅឆ្នាំ២០២០ ទីក្រុងប៉េកាំង បានដាក់ចេញនូវច្បាប់សន្តិសុខជាតិដ៏ទូលំទូលាយមួយលើទីក្រុងហុងកុង ដែលមជ្ឈមណ្ឌលហិរញ្ញវត្ថុធំមួយរបស់អាស៊ី៕