អនុរដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី លោក Kei Sato បានថ្លែងថា រដ្ឋាភិបាលជប៉ុនរក្សាជំហររបស់ខ្លួនថា បញ្ហានៃដែនដីភាគខាងជើង ដែលជប៉ុនហៅថាផ្នែកខាងត្បូងនៃប្រជុំកោះគូរីល (Kuril) ត្រូវតែដោះស្រាយ ហើយកិច្ចព្រមព្រៀងសន្តិភាព ត្រូវបានសម្រេចជាមួយប្រទេសរុស្ស៊ី។ 

លោកបាននិយាយថា៖«បញ្ហានៃដែនដីភាគខាងជើង នៅតែជាបញ្ហាសំខាន់បំផុតនៅក្នុងទំនាក់ទំនងរុស្ស៊ី-ជប៉ុន។ រដ្ឋាភិបាលរក្សាជំហររបស់ខ្លួនថា បញ្ហានៃភាពជាម្ចាស់នៃកោះភាគខាងជើងទាំង ៤ (ប្រជុំកោះគូរីលភាគខាងត្បូង) ត្រូវតែដោះស្រាយ ហើយសន្ធិសញ្ញាសន្តិភាពជាមួយរុស្ស៊ី ត្រូវបានចុះហត្ថលេខា»។

លោកបានបញ្ជាក់ជាថ្មីនូវជំហររបស់ទីក្រុងតូក្យូថា៖«ទំនាក់ទំនងរវាងជប៉ុន និងរុស្ស៊ី នៅតែមានភាពតានតឹង» ដោយសារតែស្ថានភាពនៅអ៊ុយក្រែន ប៉ុន្តែបាននិយាយថា ជប៉ុន «ប្តេជ្ញាបន្តការសន្ទនាជាមួយភាគីរុស្ស៊ី»។

ក្នុងពេលជាមួយគ្នានេះ លោក Sato បានទទួលស្គាល់ពីចំណាប់អារម្មណ៍ដែលកំពុងថយចុះក្នុងចំណោមយុវជនជប៉ុន ចំពោះបញ្ហានេះ។ លោកបានលើកឡើងថា រដ្ឋាភិបាលនឹងចាត់វិធានការដើម្បី «បង្កើនការយល់ដឹងសាធារណៈ»។ លោក Sato បានបន្ថែមថា ការចូលរួមរបស់លោកស្រីនាយករដ្ឋមន្ត្រី Sanae Takaichi នៅក្នុងការជួបជុំជាតិប្រចាំឆ្នាំ ដើម្បីទាមទារឲ្យមានការប្រគល់ទឹកដីភាគខាងជើង ដែលគ្រោងធ្វើនៅថ្ងៃទី ០៧ ខែកុម្ភៈ កំពុងត្រូវបានពិចារណានៅឡើយ៕