មន្រ្តីមួយរូបនិយាយថា នៅថ្ងៃសុក្រនេះ ក្រុមការងារជួយសង្រ្គោះ បានចូលទៅក្នុងអណ្តូងរ៉ែខុសច្បាប់ ដើម្បីស្វែងរកសាកសពមនុស្ស ក្រោយហេតុការណ៍ផ្ទុះសម្លាប់មនុស្ស ១៨នាក់ នៅរដ្ឋភាគឦសាន Meghalaya tប្រទេសឥណ្ឌា ក្នុងនោះ មនុស្សជាច្រើននាក់ផ្សេងទៀត ត្រូវបានគេជឿថា ជាប់ខ្លួន ។

នគរបាលក្នុងស្រុកនិយាយនៅក្នុងសេចក្តីថ្លែងការណ៍ថា អំឡុងប្រតិបត្តិការជួយសង្រ្គោះ សាកសពមនុស្សសរុប ១៨នាក់ ត្រូវបានរកឃើញពីទីកន្លែងផ្ទុះ ។

លោក Manish Kumar គឺជាអធិការរងនគរបាលស្រុក East Jaintia Hills និយាយប្រាប់ទីភ្នាក់ងារព័ត៌មានរ៉យទ័រថា ហេតុការណ៍ផ្ទុះក្នុងអណ្តូងរ៉ែនេះ បានកើតឡើងកាលពីវេលាម៉ោង ១០ព្រឹក ម៉ោងក្នុងស្រុក ថ្ងៃព្រហស្បតិ៍ នៅស្រុក East Jaintia Hills ។

អណ្តូងរ៉ែនេះ ធ្លាប់ត្រូវបានគេប្រើប្រាស់នៅរដ្ឋភាគឦសានប្រទេសឥណ្ឌាមួយនេះ ប៉ុន្តែត្រូវបានគេបោះបង់ចោលកាលពីឆ្នាំ ២០១៤ ដោយសារមានមនុស្សស្លាប់ច្រើនពេក និងខូចខាតដោយសារបរិស្ថាន ។

យោងតាមការប៉ាន់ប្រមាណរបស់រដ្ឋាភិបាលសហព័ន្ធឥណ្ឌា បានឲ្យដឹងថា មនុស្សសរុប ៦៣នាក់ បានស្លាប់ អំឡុងពេលជីករ៉ែខុសច្បាប់ នៅរដ្ឋភាគឦសាន Assam និងរដ្ឋ Meghalaya ចាប់តាំងពីឆ្នាំ ២០១២រហូតមក ៕