មន្ត្រីជាន់ខ្ពស់អាមេរិកម្នាក់ នៅថ្ងៃសុក្រ (ទី៦ ខែកុម្ភៈ ឆ្នាំ២០២៦) នេះ បានរិះគន់សន្ធិសញ្ញានុយក្លេអ៊ែរចុងក្រោយ រវាងរុស្ស៊ី និងសហរដ្ឋអាមេរិក ដែលខកខានមិនបានបញ្ចូលទីក្រុងប៉េកាំង ដោយបានថ្លែងសុន្ទរកថានៅអង្គការសហប្រជាជាតិ (UN) មួយថ្ងៃបន្ទាប់ពីកិច្ចព្រមព្រៀង New START នេះ ផុតកំណត់។

អនុរដ្ឋមន្ត្រីក្រសួងការបរទេស ទទួលបន្ទុកការគ្រប់គ្រងអាវុធ និងសន្តិសុខអន្តរជាតិរបស់សហរដ្ឋអាមេរិក លោក Thomas G. DiNanno បាននិយាយថា «សរុបមក សន្ធិសញ្ញា New START មានចំណុចខ្វះខាត» ដោយបានចង្អុលបង្ហាញថា វាមិនបានគ្របដណ្តប់លើអាវុធនុយក្លេអ៊ែរទាំងអស់ «ហើយវាមិនបានបញ្ចូលប្រទេសចិនឡើយ»។

អំឡុងពេលនិយាយទៅកាន់អ្នកសារព័ត៌មាន នៅទីក្រុងហ្សឺណែវ ប្រទេសស្វីស មុនពេលថ្លែងសុន្ទរកថានៅក្នុងសន្និសីទ ស្តីពីការរំសាយអាវុធ លោកបាននិយាយថា ប្រធានាធិបតីអាមេរិក លោក Donald Trump «បានបញ្ជាក់យ៉ាងច្បាស់ថា លោកចង់បានកិច្ចព្រមព្រៀងប្រសើរជាងនេះ» និង «បានបញ្ជាក់ម្តងទៀតកាលពីយប់មិញថា លោកចង់បានសន្ធិសញ្ញាថ្មីមួយ»។

លោក DiNanno បាននិយាយថា៖ «លោកបានបញ្ជាក់យ៉ាងច្បាស់។ លោកក៏បានប្រកាន់ខ្ជាប់នូវការលើកឡើងនោះផងដែរ ចាប់តាំងពីរដ្ឋបាលដំបូងរបស់លោក។ ដូច្នេះយើងនឹងរង់ចាំមើលថា តើវានឹងមានអ្វីកើតឡើង»។

នៅពេលត្រូវបានសួរថា តើប្រទេសចិនបានយល់ព្រមលើអ្វីមួយដែរ ឬអត់ទេ លោក DiNanno បានឆ្លើយតបថា «យើងតែងតែមានឆន្ទៈក្នុងការជជែកជាមួយពួកគេ»។ ប្រទេសចិនបានប្រាប់កាលពីថ្ងៃព្រហស្បតិ៍ថា ខ្លួននឹងមិនចូលរួមកិច្ចចរចានុយក្លេអ៊ែរ «នៅដំណាក់កាលនេះ» ទេ បន្ទាប់ពីសន្ធិសញ្ញាដែលផុតកំណត់នៅថ្ងៃនោះ បានបង្កឲ្យមានការភ័យខ្លាចពីការប្រណាំងប្រជែងអាវុធសកលថ្មី៕