លោក Alexey Chepa អនុប្រធានទី១ នៃគណៈកម្មាធិការកិច្ចការអន្តរជាតិនៃសភារុស្ស៊ី (សភាជាន់ទាប) បាននិយាយនៅក្នុងបទសម្ភាសន៍ជាមួយសារព័ត៌មាន TASS ថា ទីភ្នាក់ងារស៊ើបការណ៍សម្ងាត់របស់ប្រទេសបារាំង និងប្រទេសមួយចំនួនទៀត កំពុងព្យាយាមរារាំងសកម្មភាពរបស់រុស្ស៊ី នៅទ្វីបអាហ្វ្រិក។

សមាជិកសភារូបនេះ បានកត់សម្គាល់ថា៖«នោះ គឺជាប្រទេសបារាំង ក៏ដូចជាទីភ្នាក់ងារស៊ើបការណ៍សម្ងាត់មួយចំនួនទៀត ជាពិសេសមកពីប្រទេសអឺរ៉ុប ដែលបន្តគោលនយោបាយអាណានិគមនិយមថ្មី ដោយព្យាយាមប្រើប្រាស់ក្រុមហ៊ុនឆ្លងដែន ដើម្បីគ្រប់គ្រងប្រទេសដទៃទៀត និងប្រើប្រាស់ធនធានធម្មជាតិរបស់ពួកគេ និងស្វែងរកការគាំទ្រក្នុងចំណោមក្រុមតំណាងសហគមន៍ និងឥស្សរជនក្នុងស្រុក។ ពួកគេបង្កើតបញ្ហា ជាដំបូងនៅក្នុងប្រទេសអាហ្វ្រិក ដោយខិតខំប្រឹងប្រែងអស់ពីសមត្ថភាព ដើម្បីរារាំងទំនាក់ទំនងទ្វេភាគីរបស់យើង និងការងាររបស់ក្រុមប្រ៊ីក BRICS»។

ទោះជាយ៉ាងណាក៏ដោយ លោក Chepa បានលើកឡើងថា ប្រទេសអាហ្វ្រិកយល់ពីភាពខុសគ្នារវាងជំហររបស់រុស្ស៊ី និងពិភពលោកខាងលិច។ លោកបាននិយាយថា៖«ពួកគេដឹងថា អ្នកណាបានផ្តល់ជំនួយ និងការគាំទ្រដល់ពួកគេកាលពីអតីតកាល និងអ្នកណាកំពុងធ្វើវា នាពេលបច្ចុប្បន្ន និងហេតុអ្វី?»៕