គិលានុបដ្ឋាយិកានៅមន្ទីរពេទ្យក្រុង Fizi ដែលជាទីក្រុងខ្ពស់រាបស្ថិតនៅខេត្តភាគខាងកើត Kivu របស់កុងហ្គោ បានប្រញាប់បញាល់នាំទាហានរងរបួសម្នាក់ទៅវះកាត់ ក្រោយរូបលោករងរបួសជើង ។

លោក Mitterand Pumwanza Ibemo ត្រូវបានគេបាញ់ត្រូវជើងទាំងសងខាង នៅតំបន់ជួរមុខ ស្ថិតនៅភាគខាងជើងទីក្រុង Fizi ជាទីដែលការប៉ះទង្គិចគ្នាបានផ្ទុះឡើងរយៈពេលជាច្រើនសប្តាហ៍កន្លងមកហើយ រវាងកងទ័ពកុងហ្គោ និងក្រុមឧទ្ទាម ។

ការប្រយុទ្ធគ្នានៅតែខ្លាំងក្លាដដែលក្នុងតំបន់ភាគខាងកើតកុងហ្គោ ធ្វើឲ្យកិច្ចខិតខំកាន់តែស្មុគស្មាញដោយរដ្ឋបាលសហរដ្ឋអាមេរិករបស់លោកប្រធានាធិបតី Donald Trump ក្នុងការនាំមកនូវសន្តិភាព ក៏ដូចជាការវិនិយោគរ៉ែរបស់លោកខាងលិចនៅតំបន់មួយនេះ ។

នៅដើមសប្តាហ៍នេះ ក្រុមឧទ្ទាម M23 បាននិយាយពីការវាយប្រហារយានដ្រូនលើអាកាសយានដ្ឋាន Kisangani ដែលមានចម្ងាយរាប់រយគ.មពីជួរមុខ ជាការសងសឹកចំពោះការវាយប្រហារតាមច្រកអាកាសរបស់រដ្ឋាភិបាលលើភូមិដ្ឋានប្រជាពលរដ្ឋនៅខេត្ត South Kivu ។

ខណៈពេលនោះដែរ ចំនួនគ្រោះថ្នាក់ចេះតែបន្តកើនឡើង ។ មន្ទីរពេទ្យនៅទីក្រុង Fizi ដែលគាំទ្រដោយគណៈកម្មាធិការកាកបាទក្រហមអន្តរជាតិ កំពុងព្យាបាលអ្នកជំងឺរងរបួស ១១៥នាក់ ។

លោកវេជ្ជបណ្ឌិត Richard Lwandja ដែលជាគ្រូពេទ្យវះកាត់នៅមន្ទីរពេទ្យក្រុង Fizi និយាយថា ភាគច្រើននៃអ្នកជំងឺរបស់ពួកយើង មានរបួសអវៈយវៈ ពេលដែលពួកគេមកដល់ របួសរបស់ពួកគេបានក្លាយរួចទៅហើយ ដោយសារមន្ទីរពេទ្យមានចំនួនកំណត់នៅជួរមុខ ។

សូមបញ្ជាក់ថា ក្រុមឧទ្ទាម M23 បានបើកការវាយប្រហារដូចផ្លេកបន្ទោរបស់ពួកគេកាលពីដើមឆ្នាំមុន ហើយក្នុងខែកុម្ភៈ ឆ្នាំ ២០២៥ ពួកគេដណ្តើមកាន់កាប់ទីក្រុង Bukavu ដែលជារដ្ឋធានីខេត្ត South Kivu មុនពេលរុលចូលទៅតំបន់ភាគខាងត្បូងម្តងទៀត កាលពីខែធ្នូ ដើម្បីគ្រប់គ្រងបានមួយរយៈពេលទីក្រុង Uvira ស្ថិតនៅជាប់ព្រំដែនប្រទេសប៊ូរុនឌី ៕