អាជ្ញាធរនៅភាគខាងត្បូងប្រទេសអេស្ប៉ាញ បានជម្លៀសមនុស្សចេញពីតំបន់លំនៅឋាន ដោយសារបារម្ភថា ទឹកទន្លេដ៏ធំមួយ អាចឡើងហូរហៀរ ហើយនាថ្ងៃសុក្រ (ទី៦ ខែកុម្ភៈ ឆ្នាំ២០២៦) នេះ បានព្រមានអំពីការមានបំណាក់ដីដែលបណ្តាលមកពីបាក់ស្រទាប់ដីនៅក្រោមទឹក បន្ទាប់ពីព្យុះ Leonardo បានបោកបក់លើឧបទ្វីបអាយបឺរៀន (Iberian Peninsula)។

មនុស្សជាង ៧.០០០នាក់ ត្រូវបានជំរុញឲ្យចាកចេញពីផ្ទះសម្បែងរបស់ពួកគេ នៅក្នុងតំបន់ Andalusia រហូតមកដល់ពេលនេះ ស្របពេលមានព្យុះឈ្មោះ «ព្យុះរថភ្លើង» (Storm Train) ដែលជាព្យុះច្រើនកើតជាប់ៗគ្នា បានបោកបក់លើប្រទេសព័រទុយហ្គាល់ និងអេស្ប៉ាញ ដោយនាំឲ្យមានភ្លៀងធ្លាក់ខ្លាំង និងខ្យល់បក់ខ្លាំង ក្នុងរយៈពេលប៉ុន្មានសប្តាហ៍កន្លងមកនេះ។

ជាមួយគ្នានេះ ទីភ្នាក់ងារអាកាសធាតុរដ្ឋ AEMET បានព្រមានថា ព្យុះមួយទៀតឈ្មោះ Marta នឹងវាយប្រហារឧបទ្វីបនេះ នៅថ្ងៃសៅរ៍ចុងសប្ដាហ៍នេះ ដោយបង្កឲ្យមានភ្លៀងធ្លាក់ខ្លាំងជាងមុន។ តំបន់លំនៅឋានជាច្រើន នៅជិតទន្លេ Guadalquivir ក្នុងខេត្ត Cordoba របស់អេស្ប៉ាញ ត្រូវបានជម្លៀសចេញពេញមួយយប់ ដោយសារកម្រិតទឹកឡើងកាន់តែខ្លាំង។

ហើយជាមួយគ្នានេះប្រជាជនប្រមាណ ១.៥០០នាក់នៃភូមិ Grazalema ដែលជាភូមិភ្នំដ៏ពេញនិយម សម្រាប់អ្នកដើរលេងថ្មើរជើង ក៏ត្រូវបានជម្លៀសចេញផងដែរ ខណៈដែលទឹកបានហូរកាត់ជញ្ជាំងជ្រាបចូលផ្ទះ និងហូរចុះទៅតាមដងផ្លូវក្រាលថ្មចោតៗ។

នៅក្នុងទីក្រុងធំទី២ របស់ព័រទុយហ្គាល់ គឺ Porto ទឹកទន្លេ Douro បានឡើងហូរហៀរ នៅព្រឹកព្រលឹមថ្ងៃសុក្រនេះ ដែលបណ្តាលឲ្យមានទឹកជន់លិចតិចតួច នៅតាមផ្លូវតូចៗនៃមាត់ទន្លេ។ នៅភាគខាងត្បូងនៃប្រទេសនេះ តំបន់ជាច្រើននៃទីក្រុង Alcacer do Sal ក្បែរទន្លេ Sado នៅតែលិចទឹកដោយផ្នែក ដែលជាថ្ងៃទី៣ ជាប់គ្នា។ លោកនាយករដ្ឋមន្ត្រី Luis Montenegro បាននិយាយកាលពីថ្ងៃព្រហស្បតិ៍ថា រដ្ឋាភិបាលរបស់លោក បានពង្រីកស្ថានភាពគ្រោះមហន្តរាយ នៅក្នុងក្រុងចំនួន ៦៩ រហូតដល់ពាក់កណ្តាលខែកុម្ភៈ៕