នៅថ្ងៃសុក្រនេះ សហរដ្ឋអាមេរិក បានចោទប្រកាន់ទីក្រុងប៉េកាំងថា បានសាកល្បងនុយក្លេអ៊ែរដោយសម្ងាត់កាលពីឆ្នាំ ២០២០ ខណៈពួកគេអំពាវនាវឲ្យមានសន្ធិសញ្ញាគ្រប់គ្រអាវុធទូលំទូលាយជាងមុន ដែលនឹងបូករួមទាំងចិន ក៏ដូចជារុស្ស៊ី ។

ការចោទប្រកាន់នៅសន្និសីទរំសាយអាវុធសកល បានឆ្លុះបញ្ចាំងពីភាពតានតឹងធ្ងន់ធ្ងររវាងទីក្រុងវ៉ាស៊ីនតោន និងទីក្រុងប៉េកាំង ក្នុងពេលវេលាដ៏សំខាន់មួយនៃការគ្រប់គ្រងអាវុធនុយក្លេអ៊ែរ រយៈពេល ១ថ្ងៃប៉ុណ្ណោះ ក្រោយសន្ធិសញ្ញាកំណត់ការដាក់ពង្រាយក្បាលគ្រាប់ និងមីស៊ីលសហរដ្ឋអាមេរិក និងរុស្ស៊ី បានផុតកំណត់ ។

លោក Thomas DiNanno គឺជាអ្នករដ្ឋមន្រ្តីទទួលបន្ទុកការគ្រប់គ្រងអាវុធ និងសន្តិសុខអន្តរជាតិរបស់សហរដ្ឋអាមេរិក និយាយប្រាប់សន្និសីទនៅទីក្រុងហ្សឺណែវ ប្រទេសស្វីសថា លោកអាចបញ្ជាក់បានថា រដ្ឋាភិបាលសហរដ្ឋអាមេរិកដឹងថា ចិនបានធ្វើតេស្តនុយក្លេអ៊ែរ ។

លោកបន្តថា យោធាចិនព្យាយាមលាក់បាំងការធ្វើតេស្តដោយបិទបាំងការផ្ទុះនុយក្លេអ៊ែរ ពីព្រោះថា ពួកគេទទួលស្គាល់ថា ការធ្វើតេស្តបែបនេះ បំពានការប្តេជ្ញាចិត្តចំពោះបំរាមធ្វើតេស្ត ។ ចិនប្រើប្រាស់វិធីបំបែក គឺជាវិធីមួយដែលបន្ថយប្រសិទ្ធិភាពនៃការតាមដានរញ្ជួញ ដើម្បីលាក់បាំងសកម្មភាពពួកគេពីក្រសែភ្នែកពិភពលោក ។

លោក DiNanno បញ្ជាក់ថា ចិនបានធ្វើតេស្តនុយក្លេអ៊ែរបែបនេះ នៅថ្ងៃទី ២២ ខែមិថុនា ឆ្នាំ ២០២០ ៕