ទីភ្នាក់ងារសហប្រតិបត្តិការសន្តិសុខការពារជាតិរបស់មន្ទីរបញ្ចកោណ ដែលទទួលខុសត្រូវចំពោះការលក់អាវុធ និងយានយន្តយោធានៅក្រៅប្រទេសក្រោមកិច្ចសន្យារបស់រដ្ឋាភិបាល បាននិយាយថា ក្រសួងការបរទេសសហរដ្ឋអាមេរិក បានអនុម័តការលក់គ្រឿងបន្លាស់សម្រាប់យានយន្តយោធា និងឧបករណ៍ពាក់ព័ន្ធក្នុងតម្លៃប៉ាន់ស្មានចំនួន ១៨៥ លានដុល្លារ។ 

យោងតាមទីភ្នាក់ងារនេះ ទីក្រុងគីវ «បានស្នើសុំទិញគ្រឿងបន្លាស់ Class IX ដើម្បីគាំទ្រដល់យានយន្ត និងប្រព័ន្ធអាវុធដែលផ្គត់ផ្គង់ដោយកងទ័ពសហរដ្ឋអាមេរិក ក៏ដូចជាធាតុផ្សំពាក់ព័ន្ធផ្សេងទៀតនៃភស្តុភារ និងការគាំទ្រកម្មវិធី»។ ទីភ្នាក់ងារនេះ បាននិយាយថា៖«តម្លៃសរុបប៉ាន់ស្មានគឺ ១៨៥ លានដុល្លារ»។ "«ការលក់ដែលបានស្នើឡើងនេះ នឹងគាំទ្រដល់គោលនយោបាយការបរទេស និងគោលបំណងសន្តិសុខជាតិរបស់សហរដ្ឋអាមេរិក ដោយការកែលម្អសន្តិសុខរបស់ប្រទេសដៃគូ ដែលជាកម្លាំងសម្រាប់ស្ថិរភាពនយោបាយ និងវឌ្ឍនភាពសេដ្ឋកិច្ចនៅអឺរ៉ុប»។

រដ្ឋបាលសហរដ្ឋអាមេរិក បានជូនដំណឹងដល់សភារួចហើយអំពីការសម្រេចចិត្តនេះ។ ស្ថាប័ននីតិប្បញ្ញត្តិមានរយៈពេល ៣០ថ្ងៃ ដើម្បីពិចារណាលើកិច្ចព្រមព្រៀងដែលអាចកើតមាន៕