បំណាក់ផ្ទាំងទឹកកកជាច្រើន បានបាក់នៅតំបន់ភាគខាងជើងប្រទេសអ៊ីតាលីកាលពីថ្ងៃសៅរ៍ ដោយបានសម្លាប់មនុស្សយ៉ាងហោច ៣នាក់ ក្នុងនោះក្រុមជួយសង្រ្គោះ បានព្រមានថា ចំនួនមនុស្សស្លាប់សរុបអាចនឹងកើនឡើង ស្របពេលស្ថានភាពបន្តអស្ថិរភាពនៅភ្នំអាល់ ។

ក្រុមអាជ្ញាធរបញ្ជាក់ថា នៅតំបន់ Lombardy មនុស្ស ២នាក់ បានស្លាប់ដោយសារបំណាក់ផ្ទាំងទឹកកកនៅជិតឃុំ Albosaggia ។

នៅខេត្ត Trentino អ្នកជិះស្គីម្នាក់ បានស្លាប់ ក្រោយកប់ក្នុងបំណាក់ផ្ទាំងទឹកកកទី ២ ដែលបានកើតឡើង ក្រោយវេលាម៉ោង ៤ល្ងាច ម៉ោងក្នុងស្រុក នៅលើភ្នំ Marmolada ។

សេវាកម្មសង្រ្គោះភ្នំអាល់ និយាយថា ជនរងគ្រោះម្នាក់នេះ ស្ថិតក្នុងចំណោមអ្នកជិះស្គីជនជាតិអ៊ីតាលី ៤នាក់មានវ័យជាង ៤០ឆ្នាំ ។ អ្នកជិះស្គីដំបូង ត្រូវបំណាក់ផ្ទាំងទឹកកកសង្កត់លើទាំងស្រុង ខណៈអ្នកជិះស្គីផ្សេងទៀតដែលមិនបានរងរបួស បានចាប់ផ្តើមស្វែងរករូបលោក មុនពេលក្រុមជួយសង្រ្គោះមកដល់ ។ អង្គភាពឧទ្ធម្ភាគចក្រ ត្រូវបានបញ្ជូនទៅកាន់ទីនោះ ប៉ុន្តែបុរសម្នាក់ ត្រូវបានប្រកាសថាស្លាប់នៅកន្លែងកើតហេតុ ។

នៅថ្ងៃនោះដែរ បំណាក់ផ្ទាំងទឹកកនៅជ្រលងភ្នំ Aosta បានបាក់សង្កត់ដោយអន្លើរលើអ្នកជិះស្គី ២នាក់ ដែលត្រូវបានជួយសង្រ្គោះដោយមិត្តរួមក្រុម និងមិនគ្រោះថ្នាក់នោះទេ ។

ក្រុមអាជ្ញាធរនិយាយថា សេចក្តីរាយការណ៍ពីមនុស្សស្លាប់បន្ថែមទៀតបានកើតមាន បន្ទាប់ពីឧបទ្ទេវហេតុមួយនៅខេត្ត Trentino នៅមិនទាន់បានបញ្ជាក់ ៕