ប្រធានាធិបតីអ៊ុយក្រែន លោក Volodymyr Zelenskyy បានលើកឡើងថា សហរដ្ឋអាមេរិក ចង់ឱ្យទីក្រុងមូស្គូ និងទីក្រុងគីវ ស្វែងរកដំណោះស្រាយមួយ អំពីវិធីសាស្រ្តបញ្ចប់សង្គ្រាមនៅអ៊ុយក្រែន ឱ្យបានមុនរដូវក្តៅខាងមុខនេះ ពោលគឺអំឡុងខែមិថុនា។

ក្នុងសុន្ទរកថាមួយ ចេញផ្សាយដោយការិយាល័យរបស់លោកកាលពីថ្ងៃសៅរ៍ (៧ កុម្ភៈ) បន្ទាប់ពីអ៊ុយក្រែន និងរុស្ស៊ីបានធ្វើកិច្ចចរចាពីរថ្ងៃដែលសម្របសម្រួលដោយសហរដ្ឋអាមេរិក នៅទីក្រុងអាប៊ូដាប៊ីក្នុងសប្តាហ៍នេះ លោក Zelenskiy បាននិយាយថា ទីក្រុងវ៉ាស៊ីនតោន បានស្នើឱ្យមានកិច្ចចរចានៅទីក្រុងម៉ៃអាមី ក្នុងពេល ១សប្តាហ៍បន្ទាប់ ហើយទីក្រុងគីវ បានយល់ព្រមរួចរាល់ហើយលើរឿងនោះ។

លោក Zelenskyy បាននិយាយថា «អាមេរិក កំពុងស្នើឱ្យភាគីនានាបញ្ចប់សង្គ្រាមមុនពេលចាប់ផ្តើមរដូវក្តៅនេះ ហើយទំនងជានឹងដាក់សម្ពាធលើភាគីនានាឱ្យប្រកាន់ខ្ជាប់នូវកាលវិភាគនេះ»។ លោកបន្តថា «ការបោះឆ្នោតសភាអាមេរិកពាក់កណ្តាលអាណត្តិ ខែវិច្ឆិកា ឆ្នាំ២០២៦នេះ ពិតជាសំខាន់សម្រាប់រដ្ឋបាលអាមេរិក ហើយពួកគេចង់ធ្វើគ្រប់យ៉ាងឱ្យរួចរាល់នៅខែមិថុនា»។ មេដឹកនាំអ៊ុយក្រែនរូបនេះក៏បង្ហើបថា សហរដ្ឋអាមេរិក បានស្នើផែនការតាមលំដាប់លំដោយមួយ ប៉ុន្តែលោកមិនបានលម្អិតនោះទេ។

កិច្ចចរចាសប្តាហ៍នេះនៅទីក្រុងអាប៊ូដាប៊ី បានបញ្ចប់ដោយគ្មានការទម្លាយភាពទាល់ច្រកធំដុំណាមួយឡើយ ប៉ុន្តែរុស្ស៊ី និងអ៊ុយក្រែន បានយល់ព្រមដោះដូរឈ្លើយសឹកឱ្យគ្នា ១៥៧នាក់ម្ខាងៗ។ លោក Zelenskyy បាននិយាយថា ទីក្រុងវ៉ាស៊ីនតោន បានស្នើឱ្យទីក្រុងគីវ និងទីក្រុងមូស្គូ យល់ព្រមលើបទឈប់បាញ់ថ្មីមួយ ដែលគ្របដណ្តប់លើការវាយប្រហារលើហេដ្ឋារចនាសម្ព័ន្ធថាមពល ជាជំហានមួយដើម្បីបន្ថយភាពតានតឹងក្នុងអំឡុងពេលចរចា។

លោកប្រធានាធិបតីអាមេរិក Donald Trump បាននិយាយកាលពីសប្តាហ៍មុនថា ប្រធានាធិបតីរុស្ស៊ី Vladimir Putin បានយល់ព្រមលើបទឈប់បាញ់រយៈពេល ១សប្តាហ៍។ រុស្ស៊ី បានផ្អាកការវាយប្រហារលើវិស័យថាមពលរបស់អ៊ុយក្រែន រយៈពេលពីរបីថ្ងៃប៉ុណ្ណោះ ហើយបានវាយប្រហារយ៉ាងខ្លាំងម្តងទៀតនៅថ្ងៃទី៣ ខែកុម្ភៈ កន្លងទៅ៕