ប្រព័ន្ធផ្សព្វផ្សាយរដ្ឋចិន បានរាយការណ៍នៅថ្ងៃអាទិត្យ ទី៨ ខែកុម្ភៈ នេះថា ករណីផ្ទុះដ៏ធំមួយនៅរោងចក្រជីវបច្ចេកវិទ្យាមួយកន្លែង នៅភាគខាងជើងប្រទេសចិន បានសម្លាប់មនុស្សចំនួន ៨នាក់ និងបង្កការខូចខាតយ៉ាងច្រើន។ 

ទីភ្នាក់ងារសារព័ត៌មានរដ្ឋ ស៊ីនហួរ ពីមុនបានរាយការណ៍ថា មនុស្ស ៧នាក់បានស្លាប់ និងម្នាក់ទៀតបាត់ខ្លួន បន្ទាប់ពីការផ្ទុះនៅព្រឹកថ្ងៃសៅរ៍ នៅឯក្រុមហ៊ុនជីវបច្ចេកវិទ្យា Jiapeng ក្នុងខេត្តសានស៊ី ដោយដកស្រង់សម្តីអាជ្ញាធរមូលដ្ឋាន។ ក្រោយមក ស៊ីនហួរ បាននិយាយថា មនុស្ស ៨នាក់បានស្លាប់ ដោយបន្ថែមថា តំណាងផ្នែកច្បាប់របស់ក្រុមហ៊ុនត្រូវបានចាប់ខ្លួន។ ក្រុមហ៊ុននេះមានទីតាំងនៅក្នុងស្រុក Shanyin ចម្ងាយប្រហែល ៤០០គីឡូម៉ែត្រ ភាគខាងលិចទីក្រុងប៉េកាំង។

សារព៏ត៌មានស៊ីនហួរ បាននិយាយថា ប្រតិបត្តិការសម្អាតកំពុងដំណើរការ ដោយកត់សម្គាល់ថា អ្នកយកព័ត៌មានបានសង្កេតឃើញផ្សែងពណ៌លឿងចាស់ដ៏ឃ្មួលខ្មាញ់ហុយចេញពីកន្លែងផ្ទុះ។ របាយការណ៍បានបន្ថែមថា អាជ្ញាធរបានបង្កើតក្រុមមួយដើម្បីស៊ើបអង្កេតមូលហេតុនៃគ្រោះថ្នាក់នេះ។

គ្រោះថ្នាក់ឧស្សាហកម្មបែបនេះគឺមិនមែនជារឿងចម្លែកនោះទេនៅក្នុងប្រទេសចិន។ នៅចុងខែមករា ករណីផ្ទុះមួយនៅរោងចក្រផលិតដែកថែបមួយកន្លែងក្នុងខេត្តម៉ុងហ្គោលីខាងក្នុង ដែលនៅជិតខាង បានបណ្តាលឱ្យមនុស្សយ៉ាងហោចណាស់ ៩នាក់បានស្លាប់៕