សេចក្ដីរាយការណ៍ពីប្រព័ន្ធផ្សព្វផ្សាយអ៊ីស្រាអែល បានឱ្យដឹងថា គណៈរដ្ឋមន្ត្រីសន្តិសុខរបស់អ៊ីស្រាអែល បានអនុម័តវិធានការមួយចំនួននៅថ្ងៃអាទិត្យ (៨ កុម្ភៈ) ដែលនឹងបង្កលក្ខណៈកាន់តែងាយស្រួលសម្រាប់អ្នកតាំងលំនៅ នៅក្នុងតំបន់កាន់កាប់ West Bank ក្នុងការទិញយកដីធ្លី ខណៈដែលផ្តល់អំណាចអនុវត្តបន្ថែមទៀតដល់អាជ្ញាធរអ៊ីស្រាអែល ទៅលើប្រជាជនប៉ាឡេស្ទីន។

តំបន់ West Bank គឺជាតំបន់មួយក្នុងចំណោមទឹកដីដែលប៉ាឡេស្ទីនប្រឹងប្រែងក្សាទុកសម្រាប់បង្កើតរដ្ឋឯករាជ្យមួយនាពេលអនាគត។ ភាគច្រើននៃតំបន់នេះស្ថិតនៅក្រោមការគ្រប់គ្រងរបស់យោធាអ៊ីស្រាអែល ជាមួយនឹងការគ្រប់គ្រងរបស់ប៉ាឡេស្ទីនផ្ទាល់មានកំហិតខ្លាំងណាស់ នៅក្នុងតំបន់មួយចំនួនដែលគ្រប់គ្រងដោយអាជ្ញាធរប៉ាឡេស្ទីន (PA)។

ដោយដកស្រង់សេចក្តីថ្លែងការណ៍របស់រដ្ឋមន្ត្រីក្រសួងហិរញ្ញវត្ថុ លោក Bezalel Smotrich និងរដ្ឋមន្ត្រីក្រសួងការពារជាតិ លោក Israel Katz គេហទំព័រព័ត៌មានអ៊ីស្រាអែល Ynet និង Haaretz បាននិយាយថា វិធានការទាំងនេះរួមមានការលុបចោលបទប្បញ្ញត្តិអាយុកាលរាប់ទសវត្សរ៍ ដែលរារាំងពលរដ្ឋឯកជនជនជាតិជ្វីហ្វ មិនឱ្យទិញដីធ្លីនៅក្នុងតំបន់ West Bank។

សេចក្ដីរាយការណ៍បន្តថា វិធានការទាំងនេះក៏រួមមានការអនុញ្ញាតឱ្យអាជ្ញាធរអ៊ីស្រាអែល គ្រប់គ្រងទីតាំងសាសនាមួយចំនួន និងពង្រីកការត្រួតពិនិត្យ និងការដាក់កម្លាំងអនុវត្តច្បាប់ នៅតំបន់ដែលស្ថិតក្រោមការគ្រប់គ្រងរបស់អាជ្ញាធរប៉ាឡេស្ទីន ក្នុងករណីមួយចំនួន។ ប្រធានអាជ្ញាធរប៉ាឡេស្ទីន លោក Mahmoud Abbas បាននិយាយថា វិធានការថ្មីទាំងនេះគឺមានគ្រោះថ្នាក់ ខុសច្បាប់ និងស្មើនឹងការដាក់បញ្ចូលទឹកដីជាឧបសម្ព័ន្ធដ៏ជាក់ស្តែង៕