តម្លៃប្រេងសកលបានធ្លាក់ចុះនៅថ្ងៃចន្ទ ៩មករានេះ បន្ទាប់ពីសហរដ្ឋអាមេរិក និងអ៊ីរ៉ង់បានសន្យាបន្តការចរចាលើកម្មវិធីនុយក្លេអ៊ែររបស់ប្រទេសផលិតប្រេងដ៏ធំនៅមជ្ឈិមបូព៌ា ដោយកាត់បន្ថយការព្រួយបារម្ភពី លទ្ធភាពនៃការផ្ទុះជម្លោះ ដែលអាចរំខានដល់ការផ្គត់ផ្គង់ពីតំបន់នេះ។

តម្លៃប្រេងឆៅ Brent របស់អាមេរិក បានធ្លាក់ចុះ៤៩ សេន ឬ ០,៧២% មកនៅត្រឹម ៦៧,៥៦ ដុល្លារក្នុងមួយបារ៉ែល នៅម៉ោង ១និង៣៤នាទី ម៉ោងសកល បន្ទាប់ពីបានឡើងថ្លៃ៥០ សេនកាលពីថ្ងៃសុក្រសប្ដាហ៍មុន។

ចំណែកតម្លៃប្រេងឆៅ West Texas Intermediate របស់សហរដ្ឋអាមេរិកដូចគ្នានេះដែរ មានតម្លៃ៦៣,១៣ដុល្លារក្នុងមួយបារ៉ែល ធ្លាក់ចុះ៤២ សេន ឬ០,៦៦% បន្ទាប់ពីការកើនឡើង ២៦សេនកាលពីថ្ងៃសុក្រសប្ដាហ៍មុន។

អ្នកវិភាគផ្នែកទីផ្សារនៅក្រុមហ៊ុន IG លោក Tony Sycamore បាននិយាយថាតម្លៃប្រេងឆៅបានធ្លាក់ចុះក្នុងការជួញដូរដំបូងនៅសប្តាហ៍នេះ ដោយទីផ្សារបានធូរស្រាលចិត្តចំពោះកិច្ចចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់ ដែលមានលក្ខណៈស្ថាបនានៅប្រទេសអូម៉ង់។

ស្របពេលភាគីទាំងពីរបានសម្រេចបន្តការចរចាបន្ថែមទៀត ក្ដីបារម្ភភ្លាមៗនៃការរំខានដល់ការផ្គត់ផ្គង់នៅមជ្ឈិមបូព៌ាបានថយចុះច្រើន៕