នៅថ្ងៃចន្ទ (៩ កុម្ភៈ) នេះ ប្រទេសថៃ បានប្រឈមមុខនឹងការរៀបចំឡើងវិញនូវនយោបាយអភិរក្សនិយម និងភាពមិនច្បាស់លាស់ បន្ទាប់ពីគណបក្សភូមិចៃថៃ របស់លោកនាយករដ្ឋមន្ត្រីចាំផ្ទះ អនុទីន ឆានវីរៈគុល (Anutin Charnvirakul) បានឈ្នះការបោះឆ្នោតសកល ខណៈការចរចាបង្កើតរដ្ឋាភិបាលចម្រុះមួយ ត្រូវបានរំពឹងថា នឹងចាប់ផ្តើមនៅក្នុងប៉ុន្មានថ្ងៃខាងមុខនេះ ប៉ុន្តែបក្សដ៏សំខាន់មួយបានច្រានចោលជំហាននេះរួចទៅហើយ។

យោងតាមការគណនារបស់សារព័ត៌មានរ៉យទ័រ ដោយផ្អែកលើទិន្នន័យរបស់គណៈកម្មការរៀបចំការបោះឆ្នោតថៃ បានឱ្យដឹងថា ជាមួយនឹងសន្លឹកឆ្នោតចំនួន ៩៤% ដែលបានរាប់រួច គណបក្សភូមិចៃថៃ បាននាំមុខគូប្រជែងរបស់ខ្លួន បន្ទាប់ពីការបោះឆ្នោតកាលពីថ្ងៃអាទិត្យ ដោយទទួលបាន ១៩២ អាសនៈ ក្នុងចំណោម ៥០០ អាសនៈ ក្នុងសភាថៃ។

គណបក្សប្រជាជនថៃ ដែលនាំមុខគេដ៏សំខាន់ក្នុងការស្ទង់មតិមួយចំនួនមុនការបោះឆ្នោត ទទួលបានសំឡេង ១១៧ អាសនៈ ខណៈគណបក្សភឿថៃ ស្ថិតនៅលំដាប់ទីបី ដោយមាន ៧៤ អាសនៈ។ យោងតាមការគណនារបស់រ៉យទ័រ គណបក្សមួយចំនួនទៀតបានឈ្នះសរុបចំនួន ១១៧អាសនៈ ក្នុងសភាដែលមាន ៥០០អាសនៈ ប៉ុន្តែតួលេខចុងក្រោយនៃអាសនៈក្នុងបញ្ជីគណបក្ស អាចផ្លាស់ប្តូរក្រោមប្រព័ន្ធបោះឆ្នោតសមាមាត្ររបស់ថៃ។

លោក Anutin បាននិយាយកាលពីថ្ងៃអាទិត្យថា លោកកំពុងរង់ចាំភាពច្បាស់លាស់លើតួលេខចុងក្រោយ ហើយបក្សនីមួយៗនឹងធ្វើកិច្ចពិភាក្សាបង្កើតរដ្ឋាភិបាលចម្រុះ និងតែងតាំងគណៈរដ្ឋមន្ត្រី។ យ៉ាងណាមិញ ភាពមិនប្រាកដប្រជាផ្នែកនយោបាយកំពុងរង់ចាំនៅខាងមុខ ដោយបក្សប្រជាជនថៃ ដែលមានទំនោរឆ្វេងនិយម បានច្រានចោលរួចទៅហើយនូវលទ្ធភាពនៃការចូលរួមជាមួយរដ្ឋាភិបាលចម្រុះដឹកនាំដោយលោក Anutin ខណៈមេដឹកនាំបក្សប្រជាជនថៃគឺលោក Natthaphong Rueangpanyawut បាននិយាយកាលពីថ្ងៃអាទិត្យថា ខ្លួននឹងមិនបង្កើតរដ្ឋាភិបាលចម្រុះគូប្រជែងនោះទេ៕