ម្ចាស់ហាង និងអាជីវករ បានចេញតវ៉ានៅទីក្រុងបាកដាដ ប្រទេសអ៊ីរ៉ាក់ កាលពីថ្ងៃអាទិត្យ ទី៨ ខែកុម្ភៈ ប្រឆាំងនឹងការដំឡើងពន្ធគយថ្មី ដោយព្រមានថា វិធានការទាំងនេះនឹងជំរុញឱ្យតម្លៃទំនិញសម្រាប់អ្នកប្រើប្រាស់កើនឡើង ខណៈអាជីវករមួយចំនួនបានបិទអាជីវកម្មរបស់ខ្លួន ដើម្បីបង្ហាញពីសាមគ្គីភាព។

ក្រុមអ្នកតវ៉ា បានប្រមូលផ្តុំគ្នានៅជិតអាជ្ញាធរគយអ៊ីរ៉ាក់នៅក្នុងរដ្ឋធានី ដោយមានកាន់ស្លាកអំពាវនាវឱ្យបិទទីផ្សារពាណិជ្ជកម្មនៅទូទាំងប្រទេសចាប់ពីថ្ងៃអាទិត្យ។ ក្រុមបាតុករ បានឈរនៅជិតហាងទំនិញដែលបិទទ្វារ ខណៈនគរបាលបង្ក្រាបកុបកម្មត្រូវបានដាក់ពង្រាយនៅក្នុងតំបន់នោះ ហើយចរាចរណ៍បានធ្វើដំណើរឆ្លងកាត់ផ្លូវនៅក្បែរៗនោះ។

នៅទីក្រុង Mosul ហាងនានាក៏បានបិទទ្វារជាផ្នែកមួយនៃការតវ៉ាផងដែរ។ អាជ្ញាធរគយប្រទេសអ៊ីរ៉ាក់បាននិយាយថា ពុំមានការកើនឡើងពន្ធលើម្ហូបអាហារ ថ្នាំពេទ្យ និងទំនិញជាមូលដ្ឋានទេ។

ទោះជាយ៉ាងណា នឹងមានអត្រាដំឡើងពន្ធគយដែលបានកែប្រែសម្រាប់ផលិតផលផ្សេងទៀតចាប់ពី ០,៥% ដល់ភាគរយខ្ពស់ជាងនេះ។

រដ្ឋាភិបាលអ៊ីរ៉ាក់ បាននិយាយថា ការដំឡើងពន្ធទាំងនេះ អនុវត្តនៅគ្រប់ច្រកព្រំដែននិងមជ្ឈមណ្ឌលគយទាំងអស់ ហើយនឹងនៅតែមានសុពលភាព លុះត្រាតែត្រូវបានធ្វើវិសោធនកម្ម ឬផ្អាកដោយគណៈរដ្ឋមន្ត្រី។