ប្រធានាធិបតីអ៊ុយក្រែន លោក Volodymyr Zelenskyy និយាយថា ប្រទេសរបស់លោកនឹងបើកមជ្ឈមណ្ឌលនាំចេញអាវុធចំនួន១០កន្លែង ជាពិសេសសម្រាប់យានដ្រូននៅក្នុងតំបន់បាល់ទិក អឺរ៉ុបខាងជើង និងបណ្តាប្រទេសនៅអឺរ៉ុបផ្សេងទៀត នៅឆ្នាំនេះ។ លោក Zelenskyy បានប្រកាសផែនការនេះ ក្នុងអំឡុងថ្លែងសុន្ទរកថានៅសាកលវិទ្យាល័យមួយក្នុងរដ្ឋធានីគីវ កាលពីថ្ងៃអាទិត្យ។

អ៊ុយក្រែន បានខិតខំប្រឹងប្រែងដើម្បីបង្កើនការផលិតបច្ចេកវិទ្យាយានដ្រូន ក្នុងការឆ្លើយតបទៅនឹងការឈ្លានពានរបស់រុស្ស៊ី។ របាយការណ៍ប្រព័ន្ធផ្សព្វផ្សាយក្នុងស្រុកបាននិយាយថា ក្រុមហ៊ុនពាក់ព័ន្ធទៅនឹងយានដ្រូនជាង២០០ក្រុមហ៊ុន ត្រូវបានបង្កើតឡើង ដែលជាការផ្លាស់ប្តូរយ៉ាងសំខាន់ក្នុងជម្លោះ។

លោក Zelenskyy និយាយថា ការផលិតយានដ្រូនដោយប្រើប្រាស់បច្ចេកវិទ្យារបស់អ៊ុយក្រែន នឹងចាប់ផ្តើមនៅក្នុងប្រទេសអាល្លឺម៉ង់ នៅពាក់កណ្តាលខែនេះ។ លោកក៏បាននិយាយផងដែរថា ខ្សែច្រវ៉ាក់ផលិតកម្មកំពុងដំណើរការនៅក្នុងប្រទេសអង់គ្លេសរួចហើយ។

ប្រធានាធិបតីអ៊ុយក្រែន បានសង្កត់ធ្ងន់លើសមត្ថភាពបច្ចេកវិទ្យាទំនើបរបស់ប្រទេសលោក។ លោកនិយាយថា «ដោយផ្អែកលើបរិមាណនៃការផ្តល់ហិរញ្ញប្បទានដែលចូលមកក្នុងប្រទេសអ៊ុយក្រែនអំឡុងពេលសង្គ្រាម វាគឺជាឧស្សាហកម្មធំបំផុតដែលកំពុងដំណើរការនៅក្នុងប្រទេសអ៊ុយក្រែន»។

លោក Zelenskyy បានសម្តែងក្តីសង្ឃឹមក្នុងការទាក់ទាញការវិនិយោគពីបរទេសបន្ថែមទៀតទៅក្នុងឧស្សាហកម្មយានដ្រូនរបស់ប្រទេស។