រដ្ឋាភិបាលប្រទេសម៉ិកស៊ិក បាននិយាយថា នាវាពីរគ្រឿងដែលដឹកស្បៀងជាង៨០០តោនត្រូវបានបញ្ជូនទៅកាន់ប្រទេសគុយបាកាលពីថ្ងៃអាទិត្យ ទី ៨ ខែកុម្ភៈ ក្នុងពេលមានភាពតានតឹងរវាងប្រទេសអាមេរិកឡាទីន និងសហរដ្ឋអាមេរិក ដែលបានគំរាមដាក់ការដំឡើងពន្ធលើប្រទេសនានាដែលផ្គត់ផ្គង់ប្រេងឆៅទៅកាន់ប្រទេសកោះតំបន់សមុទ្រការ៉ាអ៊ីបមួយនេះ។

រដ្ឋាភិបាលបាននិយាយនៅក្នុងសេចក្តីថ្លែងការណ៍ថា នាវាពីរគ្រឿង Holbox និងនាវា Papaloapan បានចេញដំណើរពីកំពង់ផែ Veracruz នៅឆ្នេរនៃឈូងសមុទ្រម៉ិកស៊ិក ជាមួយនឹងជំនួយ៨១៤ តោន រួមមាន «ទឹកដោះគោ ផលិតផលសាច់ ឃុកឃី សណ្តែក អង្ករ ត្រីធូណា និងប្រេងបន្លែ ព្រមទាំងរបស់របរអនាម័យផ្ទាល់ខ្លួនជាច្រើនទៀត។

កាលពីសប្តាហ៍មុន មន្ត្រីប្រទេសម៉ិកស៊ិកបាននិយាយថា ពួកគេកំពុងវាយតម្លៃពីរបៀបបញ្ជូនប្រេងឥន្ធនៈទៅកាន់ប្រទេសគុយបា ដើម្បីជួយបំពេញតម្រូវការជាមូលដ្ឋានរបស់ប្រទេសកោះមួយនេះ ដូចជាអគ្គិសនី និងការដឹកជញ្ជូន ដោយមិនបង្កឱ្យមានការសងសឹកពីទីក្រុងវ៉ាស៊ីនតោនឡើយ។