ប្រភពពីឧស្សាហកម្មចម្រាញ់ប្រេង និងពាណិជ្ជកម្មឥណ្ឌា បានប្រាប់សារព័ត៌មានរ៉យទ័រថា ក្រុមហ៊ុនចម្រាញ់ប្រេងឥណ្ឌា កំពុងតែជៀសវាងពីការទិញប្រេងរបស់រុស្ស៊ី សម្រាប់ការដឹកជញ្ជូនក្នុងខែមេសា ខាងមុខនេះ ហើយត្រូវបានគេរំពឹងថា នឹងនៅតែបន្តជៀសចេញឆ្ងាយពីការជួញដូរបែបនេះក្នុងរយៈពេលកាន់តែយូរ ដើម្បីអាចជួយទីក្រុងញូវដែលី ឱ្យចុះហត្ថលេខាលើកិច្ចព្រមព្រៀងពាណិជ្ជកម្មជាមួយទីក្រុងវ៉ាស៊ីនតោន។

អាមេរិក និងឥណ្ឌា បានខិតជិតកិច្ចព្រមព្រៀងពាណិជ្ជកម្មផ្លូវការមួយកាលពីថ្ងៃសុក្រសប្ដាហ៍មុន ដោយភាគីទាំងពីរបានប្រកាសក្របខណ្ឌសម្រាប់កិច្ចព្រមព្រៀងដែលពួកគេសង្ឃឹមថា នឹងសម្រេចចុងក្រោយនៅខែមីនា ខាងមុខ ដែលនឹងបន្ថយពន្ធ និងធ្វើឱ្យកិច្ចសហប្រតិបត្តិការសេដ្ឋកិច្ចកាន់តែស៊ីជម្រៅ។

ប្រភពជួញដូរក្នុងក្រុមហ៊ុនចម្រាញ់ប្រេង បាននិយាយថា ក្រុមហ៊ុនប្រេងឥណ្ឌា Indian Oil ក្រុមហ៊ុនប្រេង Bharat Petroleum និងក្រុមហ៊ុន Reliance Industries មិនទទួលយកសំណើផ្តល់ជូនពីពាណិជ្ជករ សម្រាប់ការផ្ទុកប្រេងរុស្ស៊ី នៅខែមីនា និងមេសា នោះទេ។ ទោះជាយ៉ាងនេះក្ដី ក្រុមហ៊ុនចម្រាញ់ប្រេងទាំងនេះ បានកំណត់ពេលដឹកជញ្ជូនប្រេងរុស្ស៊ីមួយចំនួនរួចទៅហើយ ក្នុងខែមីនា ហើយក្រុមហ៊ុនចម្រាញ់ប្រេងភាគច្រើនផ្សេងទៀត បានឈប់ទិញប្រេងឆៅរបស់រុស្ស៊ី។

ទោះបីជាសេចក្តីថ្លែងការណ៍របស់អាមេរិក-ឥណ្ឌា ស្តីពីក្របខ័ណ្ឌពាណិជ្ជកម្ម មិនបាននិយាយពីប្រេងរុស្ស៊ីក៏ដោយ ក៏ប៉ុន្តែលោកប្រធានាធិបតីអាមេរិក Donald Trump បានលុបចោលពន្ធបន្ថែម ២៥% របស់លោកលើទំនិញឥណ្ឌា ដែលត្រូវបានដាក់ដោយសារការទិញប្រេងរុស្ស៊ី ពីព្រោះលោកបាននិយាយថា ទីក្រុងញូវដែលីបាន «ប្តេជ្ញាបញ្ឈប់ដោយផ្ទាល់ ឬដោយប្រយោល» លើការនាំចូលប្រេងរបស់រុស្ស៊ី។

យ៉ាងណាក៏ដោយ ទីក្រុងញូវដែលី មិនបានប្រកាសពីផែនការបញ្ឈប់ការនាំចូលប្រេងរបស់រុស្ស៊ី ជាផ្លូវការនៅឡើយទេ។ ឥណ្ឌាបានក្លាយជាអ្នកទិញចម្បង នូវប្រេងឆៅតាមសមុទ្រដែលមានតម្លៃថោករបស់រុស្ស៊ី បន្ទាប់ពីប្រតិបត្តិការយោធារបស់រុស្ស៊ី លើអ៊ុយក្រែនក្នុងឆ្នាំ២០២២៕