ទីផ្សារអាស៊ី បានកើនឡើងយ៉ាងខ្ពស់នៅថ្ងៃចន្ទ (៩ កុម្ភៈ) នេះ ខណៈដែលជ័យជម្នះដ៏គួរឱ្យភ្ញាក់ផ្អើលសម្រាប់នាយករដ្ឋមន្ត្រីជប៉ុន លោកស្រី Sanae Takaichi បានជំរុញឱ្យមានគោលនយោបាយរូបិយវត្ថុបន្ថែមទៀត ស្របពេលមានការធូរស្រាលចិត្តយ៉ាងទូលំទូលាយពីវិនិយោគិន នៅក្នុងការងើបឡើងវិញនៅនាទីចុងក្រោយនៃភាគហ៊ុនបន្ទះឈីបរបស់សហរដ្ឋអាមេរិក។

សន្ទស្សន៍ Nikkei របស់ជប៉ុន បាននាំមុខគេជាមួយនឹងកំណើនដល់ទៅជាង ៤% ដល់កម្រិតខ្ពស់បំផុត ដោយសារសំឡេងភាគច្រើនដាច់ខាតរបស់រដ្ឋាភិបាលជប៉ុន ក្នុងសភាជាន់ទាបដ៏មានឥទ្ធិពល បានបើកផ្លូវសម្រាប់ការចំណាយនិងការកាត់បន្ថយពន្ធបន្ថែមទៀត។ សន្ទស្សន៍ទូលំទូលាយបំផុតរបស់ MSCI នៃភាគហ៊ុនអាស៊ីប៉ាស៊ីហ្វិក ខាងក្រៅប្រទេសជប៉ុន ក៏បានកើនឡើងជាង ២% ហើយសន្ទស្សន៍បច្ចេកវិទ្យារបស់កូរ៉េខាងត្បូង បានហក់ឡើងលើសពី ៤%។

ភាគហ៊ុនចិន ក៏បានមើលឃើញកំណើនជាង ១% ផងដែរនៅថ្ងៃចន្ទនេះ មុនទិន្នន័យអតិផរណាគ្រោងនឹងចេញផ្សាយនៅថ្ងៃពុធសប្ដាហ៍នេះ ដែលត្រូវបានគេរំពឹងថា នឹងបង្ហាញពីការធ្លាក់ចុះនៃតម្លៃម្ហូបអាហារ និងការធ្លាក់ចុះជាបន្តបន្ទាប់នៃតម្លៃអ្នកផលិត។ ភាគហ៊ុនបន្ទះឈីប បានងើបឡើងវិញក្នុងថ្ងៃចន្ទដូចគ្នានេះ ដោយសន្ទស្សន៍ Nvidia របស់អាមេរិក កើនឡើងជិត ៨% ខណៈសន្ទស្សន៍ AMD ក៏បានកើនឡើងជាង ៨% និង Broadcom ងើបឡើងក្នុងអត្រា ៧%។

លោក Marc Jocum អ្នកយុទ្ធសាស្ត្រវិនិយោគជាន់ខ្ពស់នៅវិទ្យាស្ថាន Global X ETFs របស់អូស្ត្រាលី បាននិយាយថា៖ ជ័យជម្នះនេះផ្តល់ឱ្យលោកស្រី Takaichi នូវសំឡេងភាគច្រើនដ៏មានស្ថិរភាព ដែលអនុញ្ញាតឱ្យមានសកម្មភាពសម្រេចចិត្តដោយស្ទើរតែគ្មានការរំខាន លើការជំរុញសារពើពន្ធ បញ្ញាសិប្បនិម្មិត AI ឧបករណ៍អេឡិចត្រូនិក សន្តិសុខថាមពល ក៏ដូចជាកំណែទម្រង់យុទ្ធសាស្ត្រជាដើម៕