ភ្នំពេញ៖ ស្ថានភាពប្រេងឥន្ធនៈបានហក់ឡើងថ្លៃ ធ្វើឱ្យវិស័យសេវាដឹកជញ្ជូនក្រៅប្រព័ន្ធ មានការបន្ថែមតម្លៃសេវាដឹកជញ្ជូនខ្លះៗ ខណៈការដឹកជញ្ជូនលើផ្នែកមួយចំនួនផ្សេងទៀត នៅបន្តរក្សាតម្លៃជាធម្មតា។

លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា លើកឡើងក្នុងកិច្ចសម្ភាសន៍​ជាមួយភ្នាក់​ងារ​អ្នក​យកព័ត៌មាន​នៅថ្ងៃទី ១៥ ខែមិនាឆ្នាំ២០២២នេះថា បច្ចុប្បន្នដោយសារសង្រ្គាម រុស្សី អ៊ុយក្រែន ​គួបផ្សំនិងវិបត្តិជម្ងឺកូវីដ ១៩ បាន​និងកំពុងជះឥទ្ធិពលធ្វើ​ឲ្យមានការប្រែប្រួល​ថ្លៃប្រេង​សាំង​។

ចំពោះការហក់ឡើងពីតម្លៃប្រេងសាំងនេះ ​នឹងធ្វើឲ្យប៉ះពាល់ដល់វិស័យដឹកជញ្ជូន ជាពិសេសការ​ប៉ះពាល់​ដល់ជីវភាពរស់នៅ​របស់ប្រជាជនផងដែរ។

លោកឧកញ៉ា បន្តថា ការដឹកជញ្ជូននៅតាមបណ្តាលផ្នែកមួយចំនួន ​គឺនៅរក្សាតម្លៃសេវាជាធម្មតា ខណៈការដឹកជញ្ជូនមួយផ្នែកផ្សេងទៀត​បានបន្តឡើងថ្លៃខ្លះៗ តែស្ថិតនៅក្នុងការឡើងថ្លៃ​បន្តិចបន្ទួច​តែប៉ុណ្ណោះ។

លោកឧកញ៉ា បន្តទៀតថា ប្រសិនបើតម្លៃប្រេងនៅតែបន្តហក់ឡើង ​សមាគមនឹងប្រជុំពិភាក្សាគ្នា ដើម្បីយកមតិរួម ​ធ្វើយ៉ាងណាមិនឲ្យមានការប៉ះពាល់ ​ដល់ការ​ផ្គត់ផ្គង់​ទំនិញ​ដល់បណ្តារោងចក្រ សហគ្រាសនោះឡើយ។

ទាក់ទងពាណិជ្ជកម្មវិញ, លោកឧកញ៉ា លឹម ហេង អនុប្រធានសភាពាណិជ្ជកម្មកម្ពុជា ​លើកឡើងថា ចំពោះបញ្ហាប្រេងសាំងហក់ឡើងថ្លៃនេះ ​គឺមិនធ្វើឲ្យប៉ះពាល់ដល់ការបង្អាក់ដំណើរ ឬការបិតក្នុង​សកម្មភាព​អាជីវកម្ម ពាណិជ្ជកម្មនោះឡើយ ​ប្រសិនបើសេវាដឹកជញ្ជូន​ហក់ឡើងថ្លៃ សកម្មភាព​អាជីវកម្ម និងពាណិជ្ជកម្ម ​នឹងអាចប្រែប្រួលទៅ​តាមនៃតម្លៃនោះផងដែរ។

សូមបញ្ជាក់ថា៖ តែចាប់ពីថ្ងៃទី ១៦ ដល់បំណាច់ចុងខែ​មីនា ​ប្រេងសាំង​ធម្មតាបានហក់ឡើង ៥ ៣០០ រៀល ក្នុង១លីត្រ, ប្រេងម៉ាស៊ូត ៥ ៣០០ ក្នុង១លីត្រ ​និងប្រេងសាំង​ស៊ុបពែរ​ឡើងដល់ ៥ ៨៥០ រៀល ក្នុង១លីត្រ៕ អត្ថបទ៖ សុន រ៉ាឌី