ប្រជាជនប៉ាឡេស្ទីនប្រហែល ១៨០នាក់ បានចាកចេញពីតំបន់ហ្កាហ្សា ចាប់តាំងពីការបើកឡើងវិញនូវច្រកឆ្លងកាត់រ៉ាហ្វា (Rafah)ជាមួយអេហ្ស៊ីប រយៈពេលពីមួយសប្តាហ៍កន្លងមកនេះ។ នេះបើយោងតាម    មន្ត្រីនៅក្នុងតំបន់នេះ។

ច្រកឆ្លងកាត់រ៉ាហ្វា ដែលជាច្រកទ្វារតែមួយគត់សម្រាប់ប្រជាជនហ្កាហ្សាទៅកាន់ពិភពខាងក្រៅដែលមិនឆ្លងកាត់អ៊ីស្រាអែល បានបើកឡើងវិញសម្រាប់ការធ្វើដំណើររបស់ប្រជាជន នៅថ្ងៃទី ០២ ខែកុម្ភៈ ជិតពីរឆ្នាំបន្ទាប់ពីកងកម្លាំងអ៊ីស្រាអែល បានដណ្តើមយកគ្រប់គ្រងច្រកនេះ ក្នុងអំឡុងពេលសង្គ្រាមជាមួយក្រុមហាម៉ាស។

ចន្លោះថ្ងៃចន្ទ និងថ្ងៃព្រហស្បតិ៍សប្តាហ៍មុន មនុស្សចំនួន ១៣៥នាក់ បានឆ្លងចូលទៅក្នុងប្រទេសអេហ្ស៊ីបពីតំបន់ហ្កាហ្សាតាមរយៈច្រកឆ្លងកាត់នេះ ភាគច្រើនជាអ្នកជំងឺ និងអ្នកអមដំណើររបស់ពួកគេ។ នេះបើយោងតាមលោក Ismail Al-Thawabteh ប្រធានការិយាល័យប្រព័ន្ធផ្សព្វផ្សាយដែលគ្រប់គ្រងដោយក្រុមហាម៉ាស នៅក្នុងទឹកដីប៉ាឡេស្ទីន។

លោក Thawabteh បាននិយាយថា៖«ស្ថិតិផ្លូវការអំពីការធ្វើដំណើរនៅច្រកឆ្លងកាត់រ៉ាហ្វា ចាប់ពីថ្ងៃចន្ទ ទី ០២ ខែកុម្ភៈ ឆ្នាំ ២០២៦ រហូតដល់ថ្ងៃព្រហស្បតិ៍ ទី ០៥ ខែកុម្ភៈ ឆ្នាំ ២០២៦ បង្ហាញពីការរឹតបន្តឹងយ៉ាងខ្លាំងលើការធ្វើដំណើរ»។

លោកក៏បានបញ្ជាក់ថា ច្រកឆ្លងកាត់នេះ ត្រូវបានបិទនៅថ្ងៃសុក្រ និងថ្ងៃសៅរ៍៕