រដ្ឋមន្ត្រីការបរទេសអេហ្ស៊ីប លោក Badr Abdelatty កាលពីថ្ងៃអាទិត្យបានអំពាវនាវឱ្យដាក់ពង្រាយកម្លាំងរក្សាស្ថិរភាពអន្តរជាតិជាបន្ទាន់ដើម្បីតាមដានបទឈប់បាញ់នៅតំបន់ហ្កាហ្សា។ សេចក្តីថ្លែងការណ៍របស់ក្រសួងការបរទេសអេហ្ស៊ីបបាននិយាយថា លោក Abdelatty បានអំពាវនាវបែបនេះក្នុងអំឡុងពេលសន្ទនាតាមទូរស័ព្ទជាមួយសមភាគីប្រទេសក្រិករបស់លោកគឺលោក George Gerapetritis ខណៈអ្នកការទូតទាំងពីរបានពិភាក្សាអំពីភាពតានតឹងក្នុងតំបន់ដែលកំពុងកើនឡើង ។

លោក Abdelatty បានសង្កត់ធ្ងន់លើតម្រូវការដ៏សំខាន់ក្នុងការជំរុញដំណាក់កាលទីពីរនៃផែនការសន្តិភាពស្នើឡើងដោយសហរដ្ឋអាមេរិក រួមទាំងការដាក់ពង្រាយកម្លាំងរក្សាស្ថិរភាពអន្តរជាតិទៅកាន់តំបន់ហ្កាហ្សាដែលត្រូវបានគាំទ្រដោយក្រុមប្រឹក្សាសន្តិសុខអង្គការសហប្រជាជាតិ កាលពីខែវិច្ឆិកា ឆ្នាំមុន។

លោកបានបញ្ជាក់ជាថ្មីអំពីការគាំទ្ររបស់ប្រទេសអេហ្ស៊ីបសម្រាប់គណៈកម្មាធិការបច្ចេកទេសជាតិប៉ាឡេស្ទីនដែលទើបបង្កើតថ្មីសម្រាប់ការគ្រប់គ្រងតំបន់ហ្កាហ្សា ដោយចាត់ទុកថាវាជាស្ថាប័នអន្តរកាលដ៏សំខាន់មួយដើម្បីដោះស្រាយតម្រូវការគ្រប់គ្រង និងមនុស្សធម៌ប្រចាំថ្ងៃ។

លោកបានបញ្ជាក់ថា គណៈកម្មាធិការ ដែលត្រូវបានបង្កើតឡើងនៅពាក់កណ្តាលខែមករា មានបំណងត្រួសត្រាយផ្លូវសម្រាប់ការវិលត្រឡប់ទៅរកអភិបាលកិច្ចពេញលេញរបស់អាជ្ញាធរប៉ាឡេស្ទីននៅក្នុងដែនដីនេះ។ លោករដ្ឋមន្ត្រី ក៏បានសង្កត់ធ្ងន់លើសារៈសំខាន់នៃការធានាបានលំហូរជំនួយមនុស្សធម៌ជាបន្តបន្ទាប់ចូលទៅក្នុងតំបន់ហ្កាហ្សា និងការស្តារឡើងវិញយ៉ាងឆាប់រហ័ស។