យោធាកូរ៉េខាងត្បូង បាននិយាយថា ឧទ្ធម្ភាគចក្រវាយប្រហារធុន AH-1S Cobra របស់កងទ័ពកូរ៉េខាងត្បូង បានជួបគ្រោះថ្នាក់ នៅថ្ងៃចន្ទ (៩ កុម្ភៈ) នេះ ដោយបានធ្លាក់ក្នុងអំឡុងពេលហោះហើរហ្វឹកហ្វឺន នៅភាគខាងជើងតំបន់ Gapyeong ដោយបានសម្លាប់បុគ្គលិកទាំង ២នាក់ លើយន្តហោះនោះ។

យោធាបាននិយាយក្នុងសេចក្ដីថ្លែងការណ៍មួយថា ឧទ្ធម្ភាគចក្រនោះបានធ្លាក់ភ្លាមៗក្រោយម៉ោងក្នុងស្រុក ១១ព្រឹក ដោយសារហេតុផលមិនទាន់ច្បាស់។ ដំបូងឡើយ សមាជិកបុគ្គលិកទាំង ២នាក់ ត្រូវបានជម្លៀសទៅកាន់មន្ទីរពេទ្យក្បែរនោះ ប៉ុន្តែក្រោយមកត្រូវបានប្រកាសថាស្លាប់។

កងទ័ពបានផ្អាកប្រតិបត្តិការឧទ្ធម្ភាគចក្រ AH-1S ទាំងអស់បន្ទាប់ពីគ្រោះថ្នាក់នេះ ហើយបានបង្កើតក្រុមឆ្លើយតបបន្ទាន់មួយដើម្បីស៊ើបអង្កេតមូលហេតុនៃគ្រោះថ្នាក់។ យោងតាមយោធាបានឱ្យដឹងថា ការហោះហើរហ្វឹកហ្វឺននេះ ពាក់ព័ន្ធនឹងការអនុវត្តនីតិវិធីចុះចតបន្ទាន់ដោយមិនចាំបាច់បិទម៉ាស៊ីន។

អាជ្ញាធរបាននិយាយថា ហេតុការណ៍នេះមិនពាក់ព័ន្ធនឹងអគ្គិភ័យឬការផ្ទុះណាមួយឡើយ ហើយពួកគេក៏មានគម្រោងស៊ើបអង្កេតមូលហេតុពិតប្រាកដនៃការធ្លាក់យន្តហោះនេះផងដែរ។ ក្រសួងការពារជាតិទីក្រុងសេអ៊ូល បាននិយាយថា រដ្ឋមន្ត្រីក្រសួងការពារជាតិ លោក Ahn Gyu-back ដែលកំពុងបំពេញទស្សនកិច្ចនៅអារ៉ាប៊ីសាអ៊ូឌីត ត្រូវបានជូនដំណឹងអំពីគ្រោះថ្នាក់នេះ ហើយលោកបានអំពាវនាវឱ្យមានវិធានការតាមដានជាបន្ទាន់៕