ជប៉ុនបានបើកដំណើរការរោងចក្រថាមពលនុយក្លេអ៊ែរធំជាងគេបំផុតរបស់ពិភពលោកឡើងវិញ នៅថ្ងៃចន្ទ (ទី៩ ខែកុម្ភៈ ឆ្នាំ២០២៦) នេះ បន្ទាប់ពីការប៉ុនប៉ងនៅមុននេះ ត្រូវបានផ្អាកយ៉ាងលឿនរហ័ស ដោយសារមានបញ្ហាតិចតួច។

ក្រុមហ៊ុនថាមពលអគ្គិសនីតូក្យូ (TEPCO) បានឲ្យដឹងនៅក្នុងសេចក្តីថ្លែងការណ៍មួយថា រោងចក្រ Kashiwazaki-Kariwa នៅក្នុងតំបន់ Niigata បានចាប់ផ្តើមឡើងវិញនៅម៉ោង ២រសៀល (ម៉ោងក្នុងស្រុក)។ បញ្ហា ដោយសារប្រព័ន្ធសំឡេងរោទិ៍ប្រកាសអាសន្ន កាលពីខែមករា បានបង្ខំឲ្យផ្អាកការចាប់ផ្តើមឡើងវិញលើកដំបូងរបស់រោងចក្រនេះ គិតចាប់តាំងពីមានគ្រោះមហន្តរាយនៅរោងចក្រ Fukushima ឆ្នាំ២០១១។

រោងចក្រនេះត្រូវបានផ្អាកដំណើរការ ចាប់តាំងពីជប៉ុនបានបញ្ឈប់ប្រើប្រាស់ថាមពលនុយក្លេអ៊ែរ ក្រោយគ្រោះរញ្ជួយដីដ៏ធំ និងរលកយក្សស៊ូណាមិ បានធ្វើឲ្យរ៉េអាក់ទ័រចំនួន ៣ នៅរោងចក្រថាមពលនុយក្លេអ៊ែរ Fukushima មានបញ្ហា។

ប៉ុន្តែនាពេលនេះ ប្រទេសជប៉ុនកំពុងងាកទៅរកថាមពលអាតូមិកវិញ ដើម្បីកាត់បន្ថយការពឹងផ្អែកលើឥន្ធនៈហ្វូស៊ីល សម្រេចបានអព្យាក្រឹតភាពកាបូននៅឆ្នាំ២០៥០ និងបំពេញតម្រូវការថាមពលដែលកំពុងកើនឡើង ដោយសារបញ្ញាសិប្បនិម្មិត។

នាយករដ្ឋមន្ត្រីអភិរក្សនិយម លោកស្រី Sanae Takaichi ដែលបានទទួលជ័យជម្នះក្នុងការបោះឆ្នោតយ៉ាងគួរឲ្យភ្ញាក់ផ្អើលកាលពីថ្ងៃទី៨ ខែកុម្ភៈ បានលើកកម្ពស់ថាមពលនុយក្លេអ៊ែរ ដើម្បីផ្តល់ថាមពលដល់ប្រទេសមហាអំណាចសេដ្ឋកិច្ចនៅតំបន់អាស៊ីមួយនេះ។

ដំបូងឡើយ ក្រុមហ៊ុន TEPCO បានចាត់វិធានការចាប់ផ្តើមម៉ាស៊ីនរ៉េអាក់ទ័រមួយ ក្នុងចំណោមម៉ាស៊ីនរ៉េអាក់ទ័រទាំង៧ នៅរោងចក្រ Kashiwazaki-Kariwa កាលពីថ្ងៃទី២១ ខែមករា ប៉ុន្តែបានផ្អាក់ដំណើរការវា នៅថ្ងៃបន្ទាប់ ដោយសារសំឡេងរោរិ៍ប្រកាសអាសន្នពីប្រព័ន្ធត្រួតពិនិត្យបានបន្លឺឡើង។ ក្រុមហ៊ុនបានកែតម្រូវសំឡេងរោទិ៍ប្រកាសអាសន្ន ខណៈម៉ាស៊ីនរ៉េអាក់ទ័រប្រតិបត្តិាករ ប្រកបដោយសុវត្ថិភាព៕