អ្នកនាំពាក្យក្រសួងការបរទេសចិនលោក Lin Jian និយាយនាថ្ងៃចន្ទនេះថា គោលនយោបាយរបស់ចិនចំពោះជប៉ុននឹងមិនត្រូវបានផ្លាស់ប្តូរដោយការបោះឆ្នោតនោះទេ ។

ក្រុមចម្រុះរបស់នាយករដ្ឋមន្រ្តីជប៉ុនលោកស្រី Sanae Takaichi សម្រេចបានជ័យជំនះនៅការបោះឆ្នោតសកលកាលពីថ្ងៃអាទិត្យ ជាការត្រួសត្រាយផ្លូវចំពោះការកាត់បន្ថយពន្ធតាមការសន្យា និងការចំណាយយោធា ។

ថ្លែងនៅក្នុងសន្និសីទព័ត៌មាននាថ្ងៃចន្ទនេះ លោក Lin និយាយថា ចិនជំរុញឲ្យនាយករដ្ឋមន្រ្តីជប៉ុនដកចេញសេចក្តីអត្ថាធិប្បាយរបស់លោកស្រីពាក់ព័ន្ធនឹងបញ្ហាកោះតៃវ៉ាន់ ហើយនិងព្រមានជប៉ុនថាមិនត្រូវបង្កកំហុសយោធានិយមម្តងទៀតនោះទេ ។

គួរឲ្យដឹងថា លោកស្រី Takaichបង្កឲ្យមានជម្លោះការទូតជាមួយទីក្រុងប៉េកាំង កាលពីខែវិច្ឆិកា ឆ្នាំមុន ក្រោយលោកស្រីនិយាយថា ការវាយប្រហាររបស់ចិនលើកោះតៃវ៉ាន់ អាចស្មើនឹងស្ថានភាពគំរាមកំហែងការរស់រានសម្រាប់ជប៉ុន ហើយនិងអាចបង្កឲ្យមានការឆ្លើយតបផ្នែកយោធា ។

ចិនបានចាត់ទុកកោះតៃវ៉ានគ្រប់គ្រងបែបប្រជាធិបតេយ្យថា ជាកោះផ្តាច់ខ្លួនរបស់ពួកគេ ខណៈអាជ្ញាធរនៅលើកោះមួយនេះ បានច្រានចោលអំណះអំណាងមួយនេះ ៕