ប្រទេសចិន នៅថ្ងៃចន្ទ (ទី៩ ខែកុម្ភៈ ឆ្នាំ២០២៦) នេះ បានបដិសេធការចោទប្រកាន់របស់សហរដ្ឋអាមេរិក ដែលថា ខ្លួនបានធ្វើតេស្តគ្រាប់បែកនុយក្លេអ៊ែរដោយសម្ងាត់ ដោយចាត់ទុកការលើកឡើងនេះថា ជា «ការនិយាយកុហកទាំងស្រុង» ហើយសង្កត់ធ្ងន់ថា ទីក្រុងវ៉ាស៊ីនតោន បានប្រឹងប្រែងបង្កើតលេស ដើម្បីចាប់ផ្តើមការធ្វើតេស្តសាកល្បងផ្ទាល់ខ្លួន។

នៅឯសន្និសីទអង្គការសហប្រជាជាតិ (UN) ស្តីពីការរំសាយអាវុធ នៅទីក្រុងហ្សឺណែវ ប្រទេសស្វីស កាលពីថ្ងៃសុក្រសប្ដាហ៍កន្លងមក លោក Thomas DiNanno អនុរដ្ឋមន្ត្រីក្រសួងការបរទេស ទទួលបន្ទុកកិច្ចការគ្រប់គ្រងអាវុធរបស់សហរដ្ឋអាមេរិក បានចោទប្រកាន់ប្រទេសចិនថា បានធ្វើតេស្តទាំងនោះ ក្នុងនោះរួមទាំងការធ្វើតេស្តមួយ កាលពីថ្ងៃទី២២ ខែមិថុនា ឆ្នាំ២០២០ និងកំពុងរៀបចំ ដើម្បីធ្វើតេស្តបន្ថែមទៀត ដែលមានឥទ្ធិពលខ្លាំងជាងមុន។

នៅក្នុងសេចក្តីថ្លែងការណ៍មួយទៅកាន់សារព័ត៌មាន AFP នាថ្ងៃចន្ទនេះ ក្រសួងការបរទេសចិនបានលើកឡើងថា៖ «ការចោទប្រកាន់របស់សហរដ្ឋអាមេរិក គឺគ្មានមូលដ្ឋានទាំងស្រុង ហើយគឺជាការនិយាយកុហកទាំងស្រុង។ ប្រទេសចិនប្រឆាំងយ៉ាងម៉ឺងម៉ាត់ ចំពោះការប៉ុនប៉ងរបស់សហរដ្ឋអាមេរិក ក្នុងការបង្កើតលេស ដើម្បីចាប់ផ្តើមការធ្វើតេស្តនុយក្លេអ៊ែរឡើងវិញ»។ 

ក្រសួងក៏បានជំរុញឲ្យសហរដ្ឋអាមេរិក «បញ្ឈប់សកម្មភាពមិនទទួលខុសត្រូវរបស់ខ្លួននេះជាបន្ទាន់»។

ប្រធានាធិបតីសហរដ្ឋអាមេរិក លោក Donald Trump បាននិយាយកាលពីខែតុលាឆ្នាំមុនថា ទីក្រុងវ៉ាស៊ីនតោននឹងចាប់ផ្តើមសាកល្បងអាវុធនុយក្លេអ៊ែរ «ដោយស្មើភាពគ្នា» ជាមួយទីក្រុងមូស្គូ និងទីក្រុងប៉េកាំង ប៉ុន្តែមិនបានពន្យល់លម្អិត ឬពន្យល់ពីប្រភេទនៃការសាកល្បងនុយក្លេអ៊ែរដែលលោកចង់ចាប់ផ្ដើមឡើងវិញនោះឡើយ»៕