រដ្ឋមន្រ្តីការបរទេសរុស្ស៊ីលោក Sergei Lavrov និយាយនៅក្នុងបទសម្ភាសន៍ដែលបានចុះផ្សាយនាថ្ងៃចន្ទនេះថា រុស្ស៊ីនៅតែបើកទូលាយសម្រាប់កិច្ចសហប្រតិបត្តិការជាមួយសហរដ្ឋអាមេរិក ប៉ុន្តែលោកមិនសង្ឃឹមចំពោះទំនាក់ទំនងសេដ្ឋកិច្ចភ្លឺស្វាងនោះទេ បើទោះបីជាមានកិច្ចខិតខំកំពុងបន្តរបស់ទីក្រុងវ៉ាស៊ីនតោន ក្នុងការបញ្ចប់សង្រ្គាមអ៊ុយក្រែនក៏ដោយ ។

ថ្លែងទៅកាន់ទូរទស្សន៍ TV BRICS ដែលមានមូលដ្ឋាននៅរុស្ស៊ី លោក Lavrov បានលើកឡើងពីអ្វីដែលលោកចាត់ទុកថាជាគោលដៅ “ត្រួតត្រាសេដ្ឋកិច្ច”របស់សហរដ្ឋអាមេរិក ។

លោកនិយាយថា ពួកយើងពុំមើលឃើញអនាគតភ្លឺស្វាងណាមួយនៅក្នុងវិស័យសេដ្ឋកិច្ចជាមួយសហរដ្ឋអាមេរិកនោះទេ ។

ក្រុមមន្រ្តីរុស្ស៊ី រួមទាំងលោកប្រេសិត Kirill Dmitriev កាលពីមុនធ្លាប់បាននិយាយពីការរំពឹងទុកនៃការស្តាឡើងវិញទំនាក់ទំនងសេដ្ឋកិច្ចជាមួយសហរដ្ឋអាមេរិក ដែលជាផ្នែកមួយនៃដំណោះស្រាយសន្តិភាពអ៊ុយក្រែន ។

ទោះបីជាយ៉ាងណាក៏ដោយ លោកប្រធានាធិបតី Donald Trump ដែលបាននិយាយពីកិច្ចសហប្រតិបត្តិការសេដ្ឋកិច្ច និងបានជួបសមភាគីរុស្ស៊ីលោក Vladimir Putin នៅលើទឹកដីសហរដ្ឋអាមេរិក ចាប់តាំងពីរូបលោកវិលត្រឡប់មកកាន់សេតវិមានវិញ បានដាក់ទណ្ឌកម្មធ្ងន់ធ្ងរជាងមុនលើវិស័យថាមពលដ៏ចាំបាច់របស់រុស្ស៊ី ។

លោក Lavrov បានលើកឡើងផងដែរពីអរិភាពរបស់លោក Trumpចំពោះប្លុកប្រទេស BRICS ដែលរួមមានរុស្ស៊ី ចិន ឥណ្ឌា ប្រេស៊ីល និងប្រទេសសេដ្ឋកិច្ចកំពុងអភិវឌ្ឍធំៗជាច្រើនទៀត ។ លោកថា អាមេរិកខ្លួនឯងផ្ទាល់ បង្កឧបសគ្គសិប្បនិម្មិតតាមផ្លូវឆ្ពោះទៅកាន់ប្លុកប្រទេស BRICS ៕