មនុស្សរាប់ម៉ឺននាក់ បានជួបជុំគ្នានៅទូទាំងអូស្រ្តាលីនាថ្ងៃចន្ទនេះ ដើម្បីតវ៉ាការមកដល់របស់ប្រធានាធិបតីអ៊ីស្រាអែលលោក Isaac Herzog ដែលស្ថិតក្នុងដំណើរទស្សនកិច្ចទៅកាន់ទីក្រុងជាច្រើន ដោយមានគោលបំណងបង្ហាញសាមគ្គីភាពជាមួយសហគមន៍ជនជាតិជីហ្វរបស់អូស្រ្តាលី បន្ទាប់ពីការបាញ់ប្រហារស្លាប់មនុស្សទ្រង់ទ្រាយធំកាលពីឆ្នាំមុន ។

លោក Herzog នឹងបំពេញដំណើរទស្សនកិច្ចនៅអូស្ត្រាលីក្នុងសប្តាហ៍នេះ បន្ទាប់ពីការអញ្ជើញរបស់នាយរដ្ឋមន្រ្តីអូស្រ្តាលីលោក Anthony Albanese ក្រោយការបាញ់ប្រហារសម្លាប់មនុស្ស ១៥នាក់ កាលពីថ្ងៃទី ១៤ ខែធ្នូរ ឆ្នាំ ២០២៥ នៅពិធីបុណ្យ Hanukkah ដែលបានរៀបចំឡើងនៅតំបន់ឆ្នេរសមុទ្រ Bondi ស្ថិតក្នុងទីក្រុងស៊ីដន ។

ដំណើរទស្សនកិច្ចនេះ បង្កឲ្យមានការខឹងសម្បារយ៉ាងខ្លាំងក្នុងចំណោមពលរដ្ឋមួយចំនួននៅអូស្រ្តាលី ដែលបានចោទប្រកាន់លោក Herzog ថាបានរួមចំណែកក្នុងការការសម្លាប់ជនស៊ីវិលនៅតំបន់ហ្កាហ្សា ។ ក្រុមគាំទ្រជនប៉ាឡេស្ទីន បានរៀបចំការតវ៉ានៅទីក្រុងតូច-ធំជាច្រើនកន្លែង ទូទាំងប្រទេស នៅល្ងាចថ្ងៃចន្ទនេះ ។

នៅទីក្រុងស៊ីដនី មនុស្សរាប់ពាន់នាក់ បានជួបជុំគ្នានៅសាលាក្រុង ស្ថិតនៅតំបន់ធុរកិច្ចភាគកណ្តាលទីក្រុង ស្តាប់សុន្ទរកថា និងស្រែកពាក្យស្លោកគាំទ្រប៉ាឡេស្ទីន ។ 

ដោយឡែក នគរបាលប្រហែល ៣ពាន់នាក់ ត្រូវបានដាក់ពង្រាយនៅទូទាំងទីក្រុងស៊ីដនី អំឡុងដំណើរទស្សនកិច្ចរបស់លោក Herzog មកកាន់ទីក្រុងមួយនេះ ៕