ទីក្រុងប៉េកាំងបានព្រមានទីក្រុងតូក្យូកាលពីថ្ងៃចន្ទ៩កុម្ភៈសប្ដាហ៍នេះថា រាល់សកម្មភាពមិនប្រុងប្រយ័ត្ននឹងត្រូវបានតបតវិញដោយការឆ្លើយតបយ៉ាងម៉ឺងម៉ាត់ មួយថ្ងៃបន្ទាប់ពីនាយករដ្ឋមន្ត្រីជប៉ុនលោកស្រី Sanae Takaichi ដែលត្រូវបានគេមើលឃើញថាជាអ្នករិះគន់ប្រទេសចិន បានឈ្នះការបោះឆ្នោតយ៉ាងច្រើនលើសលុប។

ប្រទេសចិន និងជប៉ុន ត្រូវបានជាប់គាំងនៅក្នុងជម្លោះពាក្យសម្ដីជុំវិញការអត្ថាធិប្បាយរបស់លោកស្រី Takaichi កាលពីខែវិច្ឆិកា២០២៥ ថាទីក្រុងតូក្យូអាចធ្វើអន្តរាគមន៍យោធាក្នុងការវាយប្រហារណាមួយលើកោះតៃវ៉ាន់។

ប្រទេសចិនអះអាងថាកោះប្រជាធិបតេយ្យមួយនេះជាផ្នែកមួយនៃទឹកដីរបស់ខ្លួន ហើយពុំបានច្រានចោលការប្រើប្រាស់កម្លាំងដើម្បីក្រសោបយកនោះទេ។

អ្នកនាំពាក្យក្រសួងការបរទេសចិន លោក Lin Jian កាលពីថ្ងៃចន្ទដដែលនោះ បានជំរុញឱ្យប្រទេសជប៉ុនដកការអត្ថាធិប្បាយទាំងនោះចេញ និងបានព្រមានអំពីផលវិបាកសម្រាប់សកម្មភាពមិនប្រុងប្រយ័ត្នណាមួយ។

អ្នកនាំពាក្យរូបនេះបានប្រាប់សន្និសីទសារព័ត៌មានប្រចាំថ្ងៃថា ប្រសិនបើកងកម្លាំងស្តាំនិយមជ្រុលនៅប្រទេសជប៉ុន វិនិច្ឆ័យខុសអំពីស្ថានភាព ហើយធ្វើសកម្មភាពដោយខ្វះការប្រុងប្រយ័ត្ន ពួកគេនឹងប្រឈមការតស៊ូពីប្រជាជនជប៉ុន និងការឆ្លើយតបយ៉ាងម៉ឺងម៉ាត់ពីសហគមន៍អន្តរជាតិជាមិនខាន៕