មន្ត្រីថៃមួយរូបបាននិយាយកាលពីថ្ងៃចន្ទ (៩ កុម្ភៈ) ថា រដ្ឋាភិបាលបន្ទាប់របស់ប្រទេសថៃ ទំនងជានឹងចូលកាន់តំណែងនៅចុងខែមេសា ឆ្នាំ២០២៦ ខាងមុខនេះ បន្ទាប់ពីគណបក្សភូមិចៃថៃ ទទួលបានជ័យជម្នះក្នុងការបោះឆ្នោត។ លោក Siripong Angkasakulkiat អ្នកនាំពាក្យរដ្ឋាភិបាលថៃ និងជាសមាជិកបក្សភូមិចៃថៃ ដែលបានឈ្នះមួយអាសនៈសភាក្នុងការបោះឆ្នោតថ្ងៃអាទិត្យកន្លងទៅ បាននិយាយថា «នឹងពុំមានការអូសបន្លាយពេលវេលាតាមការចង់បានរបស់ខ្លួននោះទេ»។

បក្សភូមិចៃថៃ របស់លោកនាយករដ្ឋមន្ត្រីចាំផ្ទះ Anutin Charnvirakul បានឈ្នះក្នុងការបោះឆ្នោតជាតិកាលពីថ្ងៃអាទិត្យ ដែលបង្កើនការរំពឹងទុកថា នឹងមានរដ្ឋាភិបាលចម្រុះមួយដើម្បីអាចបញ្ចប់អស្ថិរភាពនយោបាយដ៏យូរមកហើយ។ យោងតាមច្បាប់ថៃ សភាត្រូវតែជួបជុំគ្នាដើម្បីជ្រើសរើសប្រធានសភា និងជ្រើសរើសនាយករដ្ឋមន្ត្រីថ្មីរយៈពេល ១៥ថ្ងៃបន្ទាប់ពីលទ្ធផលត្រូវបានបញ្ជាក់ជាផ្លូវការដោយគណៈកម្មការរៀបចំការបោះឆ្នោត ដែលគណៈកម្មការនេះមានរយៈពេល ៦០ថ្ងៃដើម្បីធ្វើដូច្នេះ។

បក្សណាក៏ដោយដែលមានលើសពី ២៥អាសនៈ អាចតែងតាំងបេក្ខភាពនាយករដ្ឋមន្ត្រីមួយរូបសម្រាប់ការបោះឆ្នោតក្នុងសភា ប៉ុន្តែបេក្ខជនបែបនេះ នឹងត្រូវតែទទួលបានការគាំទ្រពីសមាជិកសភាជាងពាក់កណ្តាលនៃសមាជិកសភាទាំង ៥០០រូប មុនពេលអាចបង្កើតគណៈរដ្ឋមន្ត្រីបាន។ ប្រសិនបើការបោះឆ្នោតក្នុងសភាមិនបានសម្រេច សភាត្រូវតែកោះប្រជុំម្តងទៀត ហើយធ្វើនីតិវិធីនេះជាថ្មីឡើងវិញ រហូតដល់នាយករដ្ឋមន្ត្រីត្រូវបានជ្រើសរើស។

យោងតាមលទ្ធផលបឋម ដែលចេញផ្សាយដោយគណៈកម្មការរៀបចំការបោះឆ្នោតថៃ ដោយសម្អាងដល់ទិន្នន័យពីការិយាល័យបោះឆ្នោតជិត ៩៥% បង្ហាញថា បក្សភូមិចៃថៃ ឈ្នះប្រហែល ១៩២ អាសនៈ ទៅ ១៩៣ អាសនៈ បើធៀបទៅនឹងចំនួនប្រហែល ១១៧ អាសនៈ ទៅ ១១៨ អាសនៈ សម្រាប់គណបក្សប្រជាជនថៃ ដែលជាក្រុមជឿនលឿន និងប្រមាណ ៧៤ អាសនៈ សម្រាប់គណបក្សភឿថៃ ដែលធ្លាប់មានឥទ្ធិពល។ យោងតាមការគណនារបស់សារព័ត៌មានរ៉យទ័រលើទិន្នន័យរបស់គណៈកម្មការរៀបចំការបោះឆ្នោត បង្ហាញថា គណបក្សមួយចំនួនទៀត បានឈ្នះសរុបចំនួន ១១៧អាសនៈ នៅក្នុងសភាដែលមាន ៥០០អាសនៈ៕