​ប្រណាំង​ម៉ូតូ​៖ ប្រធានាធិបតី​ឥណ្ឌូនេស៊ី​លោក Joko Widodo បាន​ស្វាគមន៍​ជួប​សំណេះសំណាល​ជាមួយ​កីឡាករ​ប្រណាំង​ម៉ូតូពិភពលោកនៅ​វិមាន​ប្រធានាធិបតី មុន​ការប្រកួតប្រណាំង MotoGP ជា​លើកដំបូង​លើ​ទឹកដី​ឥណ្ឌូនេស៊ី​ក្នុង​រយៈពេល ២៥ឆ្នាំ​។

​​បន្ទាប់ពី​ជួប​សំណេះសំណាល​រួច​លោក Joko Widodo ដែលជា​មនុស្ស​ចូលចិត្ត​ម៉ូតូ​ដែរនោះ ក៏បាន​ជិះ​ម៉ូតូ​មួយគ្រឿង​ដែរ​តែ​មិនមែន​ម៉ូតូ​ប្រណាំង​ឡើយ អមដោយ​ស្នាមញញឹម​របស់​កីឡាករ​លំដាប់​ពិភពលោក​ដូចជា Marc Marquez ជាដើម​។ ​សំបុត្រ​ចូលរួម​ទស្សនា​ផ្ទាល់​សំរាប់​ការប្រកួត​ថ្ងៃអាទិត្យ​នេះ ត្រូវបាន​លក់​ចេញ​អស់​គ្មាន​សល់​ឡើយ​នៅ​ទីលានប្រណាំង​យានយន្ត Mandalika នៅលើ​កោះ Lombok ដែល​នៅ​ភាគ​ខាងកើត​កោះ​បាលី​។ ​យ៉ាងណាក្តី​ទីលានប្រណាំង​មួយ​នេះក៏​រង​ការរិះគន់​មួយចំនួន​ដែរ ​ពី​ផលប៉ះពាល់​ទៅលើ​ប្រជាជន​រស់​នៅក្បែរនោះ មួយចំនួន​ត្រូវ​ផ្លាស់ប្តូរ​ទីលំនៅ និង​មួយចំនួន​ដែល​មិន​ផ្លាស់ប្តូរ​ទីលំនៅ​បាន​រអ៊ូរទាំ​ពី​បញ្ហា​បរិស្ថាន​។​

​​ជាមួយគ្នា​នោះដែរ​នៅពេល​ជិះ​សាកល្បង​កាលពី​ខែ​មុន កីឡាករ​មួយចំនួន​ក៏បាន​រិះគន់​ពី​ទីលាន​នេះដែរ​ដោយ​ថា ផ្លូវ​មាន​កន្លែង​ខ្លះ​បែក​ក្រហែង ដែល​អាច​ប៉ះពាល់​ដល់​សុវត្ថិភាព​របស់​កីឡាករ​អំឡុងពេល​ប្រណាំង​។ ​យ៉ាងណាក្តី​អ្នករៀបចំ​បានទទួល​ដឹង​បញ្ហា​ទាំងនេះ និង​ដោះស្រាយ​រួចរាល់​ទាន់ពេលវេលា​ផងដែរ​មុន​ការប្រកួត​ចុង​សប្តាហ៍​នេះ​។ សូមបញ្ជាក់ថា MotoGP ចាប់ផ្តើម​រដូវ​កាល ២០២២ បាន​មួយ​ទីលាន​ហើយ​កាលពី​ថ្ងៃទី៦ ខែ​មីនា​នេះ​នៅ​ប្រទេស​កាតា​ដែល​ឈ្នះ​ដោយ​កីឡាករ​អ៊ីតាលី Enea Bastianini៕

​អត្ថបទ​៖​នាង សុភា​វុ​ធ