សហរដ្ឋអាមេរិកបានចេញគោលការណ៍ណែនាំថ្មីដល់នាវាមានទង់ជាតិអាមេរិកដែលធ្វើដំណើរឆ្លងកាត់ច្រកសមុទ្រហ័រមូស (Hormuz) ដោយអំពាវនាវឱ្យពួកគេនៅឱ្យឆ្ងាយពីដែនទឹករបស់អ៊ីរ៉ង់ ស្របពេលមានភាពតានតឹងរវាងទីក្រុងវ៉ាស៊ីនតោន និងទីក្រុងតេអេរ៉ង់។

សេចក្ដីណែនាំដែលចេញផ្សាយដោយរដ្ឋបាលដែនសមុទ្រសហរដ្ឋអាមេរិកកាលពីថ្ងៃចន្ទ ៩កុម្ភៈសប្ដាហ៍នេះ ក៏បានជំរុញឱ្យប្រធានគ្រប់គ្រងនាវាអាមេរិកកុំផ្តល់ការអនុញ្ញាតឱ្យកងកម្លាំងអ៊ីរ៉ង់ឡើងលើនាវាអាមេរិក។

គោលការណ៍ណែនាំបានសរសេរថា ប្រសិនបើកងកម្លាំងអ៊ីរ៉ង់ឡើងលើនាវាពាណិជ្ជកម្មដែលមានទង់ជាតិអាមេរិក ក្រុមនាវិកមិនគួរទប់ទល់នឹងភាគីឡើងលើនាវាដោយកម្លាំងនោះទេ។ ការចៀសវាងការប៉ះទង្គិចដោយកម្លាំងពុំមានន័យថាយល់ព្រម ឬអនុញ្ញាតឱ្យឡើងនោះទេ។

គោលការណ៍ណែនាំខាងលើបានណែនាំថានាវាពាណិជ្ជកម្មមានទង់ជាតិអាមេរិកដែលឆ្លងកាត់ដែនទឹកទាំងនេះនៅឱ្យឆ្ងាយតាមដែលអាចធ្វើទៅបានពីដែនសមុទ្រអ៊ីរ៉ង់ដោយមិនធ្វើឱ្យប៉ះពាល់ដល់សុវត្ថិភាពនាវាចរណ៍។ នៅពេលធ្វើដំណើរឆ្ពោះទៅទិសខាងកើតនៅក្នុងច្រកសមុទ្រហ័រមូស នាវាទាំងឡាយត្រូវធ្វើដំណើរទៅជិតដែនសមុទ្ររបស់ប្រទេសអូម៉ង់។

សេចក្ដីណែនាំទាំងនេះបានកើតឡើងបន្ទាប់ពីសហរដ្ឋអាមេរិក និងអ៊ីរ៉ង់ បានធ្វើកិច្ចចរចាដោយប្រយោលមួយជុំនៅប្រទេសអូម៉ង់កាលពីថ្ងៃសុក្រសប្ដាហ៍មុន បន្ទាប់ពីមានការកើនឡើងនៃវោហារសាស្ត្រ និងការគំរាមកំហែងជាច្រើនសប្តាហ៍ ដែលនាំប្រទេសទាំងពីរឈានដល់កម្រិតប្រឈមខ្លាំងនៃការផ្ទុះសង្គ្រាម៕